ماسکو: روس میں نجی ایئرلائن کی پرواز میں نشے میں دھت مسافر کی کاک پٹ میں داخل ہونے کی کوشش مسافروں نے ناکام بنادی۔
غیرملکی خبررساں ادارے کی رپورٹ کے مطابق روس میں لوکل پرواز میں نشے میں دھت مسافر نے ہنگامہ کھڑا کردیا اور مبینہ طور پر کاک پٹ پر حملہ کرنے کی کوشش کی۔
جہاز میں سوار دیگر مسافروں نے جب یہ سارا منظر دیکھا تو اسے نشست پر بیٹھا کر ٹیپ سے باندھ دیا تاکہ وہ مزید کوئی کارروائی نہ کرسکے۔
رپورٹ کے مطابق روس میں مسافر پرواز ایس 7 میں سوار تھا، پرواز منرلنی ووڈی سےنووسیبیر سک جارہی تھی جب دوران پرواز مسافر نے اچانک جارحانہ رویہ اختیار کیا اور کپتان سے بات کرنے کا مطالبہ کرتے ہوئے کاک پٹ میں داخل ہونے کی کوشش کی۔
دوسرے مسافروں نے جب یہ سارا منظر دیکھا تو مذکورہ شخص کو روک لیا اور ٹیپ سے بزنس کلاس کی ایک خالی نشست پر اسے باندھ دیا۔
روسی وزارت دفاع کے مطابق اس شخص نے فلائٹ میں سوار ہونے سے پہلے نشہ کررکھا تھا اور اسے پرواز کی لینڈنگ کے بعد گرفتار کرکے تفتیش کے لیے سیل میں بند کردیا گیا ہے۔
رپورٹ کے مطابق نشے میں دھت شخص نے پولیس اسٹیشن میں اپنا جارحانہ رویہ اختیار کیے رکھا اور پولیس اہلکاروں سے بھی بدسلوکی کی۔
روسی حکام کا کہنا ہے کہ اس شخص کے خلاف تحقیقات کا آغاز کردیا گیا ہے اس کو پانچ سال تک قید کی سزا ہوسکتی ہے۔
