ریاض: سعودی عرب میں خاتون کو ڈرائیونگ کے دوران کرتب دکھانا مہنگا پڑ گیا۔
غیرملکی خبررساں ادارے کی رپورٹ کے مطابق سعودی عرب میں ڈرائیونگ کے دوران کرتب دکھانے والی خاتون کو گرفتار کرلیا گیا۔
گرفتار خاتون سعودی عرب کے شہر القطیف کی رہائشی ہیں، ویڈیو میں دیکھا جاسکتا ہے کہ خاتون سڑک پر سرخ رنگ کی اسپورٹس کار میں کرتب دکھا رہی ہیں۔
رپورٹ کے مطابق سعودی خاتون کی خطرناک انداز میں ڈرائیونگ کرنے کی ویڈیو سوشل میڈیا پر وائرل ہوئی تھی جس کے بعد حکام نے انہیں گرفتار کیا۔
واضح رہے کہ سعودی عرب میں ٹریفک کی اس طرح کی خلاف ورزیوں پر 20 ہزار ریال جرمانہ بھی عائد کیا جاتا ہے جبکہ گاڑی کو 15 دن کے لیے ضبط کرلیا جاتا ہے۔
سعودی محکمہ ٹریفک کا کہنا تھا کہ ٹریفک خلاف ورزیاں پکڑنے کے لیے اسمارٹ کیمرے جلد استعمال کیے جائیں گے۔
مزید پڑھیں: سعودی عرب: 20 ہزار ریال جرمانے والی ٹریفک خلاف ورزیاں کون سی ہیں؟
محکمے نے ٹریفک خلاف ورزیوں اور ان کے جرمانے کی فہرست ایک بار پھر جاری کی تھی جو کچھ یوں ہے، ریڈ سگنل توڑنا بڑی خلاف ورزی ہے اس پر 3 ہزار سے لے کر 6 ہزار ریال تک کا جرمانہ مقرر ہے۔
ٹائر اسکریچنگ پر 20 ہزار ریال تک کا جرمانہ ہے، ٹائر اسکریچنگ میں استعمال ہونے والی گاڑی 15 دن کے لیے ضبط کرلی جائے گی۔
کسی اور گاڑی کی نمبر پلیٹ استعمال کرنا قانوناً جرم ہے، اس پر 5 ہزار سے لے کر 10 ہزار ریال تک کا جرمانہ ہے، مذکورہ نمبر پلیٹ ہٹانے تک گاڑی محکمہ ٹریفک کی تحویل میں رہے گی۔