کراچی : کورنگی روڈ پر موبائل سمز بیچنے والے نوجوان پر تیزاب گردی کے واقعہ میں اہم پیشرفت سامنے آئی ہے، زخمی نوجوان نے ویڈیو ریکارڈ کروا دیا۔
اے آر وائی نیوز کی رپورٹ کے مطابق تیزاب گردی کے شکار زخمی نوجوان ذاکرعلی نے ویڈیو بیان میں بتایا کہ گزشتہ رات 9بجے موٹر سائیکل سوار دو افراد میرے پاس آئے، میں اُس وقت ایک کسٹمر کو ڈیل کرنے میں مصروف تھا۔
متاثرہ نوجوان ذاکرعلی نے کہا کہ ایک نامعلوم شخص نے مجھ سے سم بند کرنے کا پوچھا تو میں نے منع کردیا، میں نے بتایا کہ سم بند نہیں کرتا، صرف فروخت کرنے کا کام کرتا ہوں۔،
ذاکر علی نے بتایا کہ پھر میں اپنے کام میں مصروف ہوگیا، اچانک وہ شخص تیزاب پھینک کر فرار ہوگیا، تیزاب پھینکے جانے سے میرا چہرہ اور گردن جھلس گئی ہیں۔
اس حوالے سے پولیس کا کہنا ہے کہ تیزاب گردی سے جھلس کر زخمی ہونے والےنوجوان کو طبی امداد فراہم کی جارہی ہے، واقعے کی تفتیش جاری ہے اس سلسلے میں اطراف کی سی سی ٹی وی فوٹیج بھی حاصل کی جارہی ہیں۔
عدنان راجپوت اے آر وائی نیوز سے بطور کرائم رپورٹر وابستہ ہیں