ممبئی: فلموں کے حوالے سے مشہور صفِ اول کی سب سے بڑی ویب سائٹ ’آئی ایم ڈی بی‘ پر آننیا پانڈے اور وجے دیوراکونڈا کی فلم ’لائیگر‘ سب سے زیادہ ناپسندیدہ فلم بن گئی۔
بھارتی میڈیا کی رپورٹس کے مطابق ’لائیگر‘ عامر خان کی فلم ’لال سنگھ چڈھا‘ کا مقابلہ بھی نہ کر سکی جو بھارت میں بُری طرح فلاپ ہوچکی ہے۔
’لال سنگھ چڈھا‘ کی ریٹنگ پانچ، اکشے کمار کی ’رکشہ بندھن‘ 4 اعشاریہ 6 اور تاپیسی پنو کی ’دوبارہ ‘ کی 2 اعشاریہ 9 ہے۔ ان کے برعکس ’لائیگر‘ کی ریٹنگ صرف 1 اعشاریہ 9 ہے۔
مزید پڑھیں: ’لائیگر‘ میں آننیا غیر متاثر کُن اداکاری کے باعث تنقید کی زد میں آگئیں
فلمسازوں کی توقع کے برعکس ’لائیگر‘ دیکھنے والوں کو متاثر کرنے میں ناکام ہوگئی۔ فلمساز کرن جوہر، پوری جگنادھ سمیت دیگر کی مشترکہ پیشکش کو شائقین اور ناقدین کی جانب سے ملے جلے ردعمل کا سامنا ہے۔
فلم میں کم معاوضہ لینے والے وجے دیوراکونڈا کی اداکاری کو ہر کسی نے سراہا مگر آننیا پانڈے کو غیر متاثر کُن پرفارمس کی وجہ سے تنقید کا سامنا ہے۔
سوشل میڈیا پر صارفین کا ماننا ہے کہ آننیا پانڈے میں اداکارہ بننے کی صلاحیت نہیں ہے، انہیں اداکارہ ہرگز نہیں کہا جا سکتا اور فلمسازوں کو چاہیے کہ وہ آننیا کو آئندہ فلموں میں کاسٹ نہ کریں ورنہ سب فلاپ ہو جائیں گی۔
