فلوریڈا: امریکی ریاست فلوریڈا کے شہر میامی میں مسافر بردار طیارہ چلتی کار پر آگرا۔
غیرملکی خبررساں ادارے کی رپورٹ کے مطابق امریکی ریاست فلوریڈا کے شہر میامی میں گزشتہ دنوں ایک چھوٹا طیارہ پل پر سے گزرنے والی ایک کار کے اوپر آ گرا جس کے نتیجے میں ایک شخص ہلاک اور پانچ زخمی ہو گئے۔
حادثہ دوپہر کے وقت ہالور اِنلیٹ پل پر پیش آیا جس سے پل پر ٹریفک کی روانی متاثر ہوئی۔
طیارہ حادثے کے مناظر کیمرے کی آنکھ میں قید ہوگئے جس کی ویڈیو سوشل میڈیا پر وائرل ہورہی ہے۔
وڈیو میں دیکھا جا سکتا ہے کہ حادثے کا شکار نجی کمپنی کا طیارہ فنی خرابی کے باعث ایک کار پر گرا جس میں ایک خاتون اور اُن کے دو چھوٹے بچے سوار تھے تاہم خوش قسمتی سے خاتون اور دونوں بچے محفوظ رہے۔
Drone camera shows moments after a small plane crashed on a Miami bridge yesterday after losing engine power. One of the three people on board was fatally injured. https://t.co/Yq3b0h1irc
📹 BoatzoneUS pic.twitter.com/834GUUQwOD
— Breaking Aviation News & Videos (@aviationbrk) May 15, 2022
حادثے کے بعد طیارے کو آگ لگ گئی جس سے فضا میں گہرے کالے دھویں کے بادل چھا گئے۔
ویڈیو میں طیارے کی زد میں آنے والی بدقسمت ایس یو وی گاڑی بھی تباہ شدہ حالت میں دیکھی جا سکتی ہے۔
فائر فائٹرز نے موقع پر پہنچ کر طیارے میں لگی آگ پر قابو پایا اور زخمیوں کو اسپتال منتقل کیا گیا تاہم طیارے میں سوار ایک شخص جان کی بازی ہار گیا۔
فیڈرل ایوی ایشن ایڈمنسٹریشن (ایف اے اے) کے حکام نے تصدیق کی ہے کہ سنگل انجن والے سیسنا 172 طیارے میں 3 افراد سوار تھے جو انجن میں خرابی کے باعث میامی ہائی وے برج پر گر کر تباہ ہو گیا۔