ریاض: سعودی عرب میں کرونا وائرس سے نمٹنے کے لیے حکومتی کوششوں میں ساتھ دینے کے لیے 1 لاکھ سے زائد رضا کاروں نے اپنی خدمات پیش کردیں۔
سعودی ویب سائٹ کے مطابق سعودی عرب میں موجود 1 لاکھ سے زائد رضا کاروں نے کرونا وائرس کے خلاف جاری حکومتی کوششوں میں اپنے تعاون اور خدمات کی پیش کش کی ہے۔
ان رضا کاروں نے اور عام شہریوں نے صحت کے مختلف شعبوں میں حصہ لینے کے لیے خواہش اور دلچسپی کا اظہار کیا ہے۔
سعودی وزیر صحت ڈاکٹر توفیق الربعیہ نے اپنے ایک ٹویٹ پیغام میں رضا کاروں سے آن لائن درخواستیں وصول کرنے کے لیے حکمت عملی تیار کی ہے، وزارت کو اب تک ایک لاکھ سے زائد درخواستیں موصول ہو چکی ہیں۔
وزارت صحت کے رضاکارانہ مرکز کے ڈائریکٹر جنرل ڈاکٹر صفر باتر نے کہا ہے کہ خواہشمند صحت اور دیگر عمومی خدمات کے لیےدرخواستیں دے سکتے ہیں۔
انہوں نے کہا کہ وبائی امور کے متعلق آگہی اور تفتیش کے دوران مختلف محلوں میں جا کر ایسے واقعات درج کرنے اور آگہی مہم چلانے کے لیے بھی رضا کاروں کے مواقع ہیں، وزارت ہنگامی محکموں اور انتہائی نگہداشت کے یونٹوں کے لیے میڈیکل پریکٹشنرز کو بھی خوش آمدید کہہ رہی ہے۔
واضح رہے کہ سعودی عرب میں طبی اور امدادی سرگرمیوں کے لیے 8 ہزار سے زائد رضا کار پہلے سے ہی میدان میں موجود ہیں، ان رضاکاروں نے کمیشن برائے صحت کی زیر نگرانی خصوصی اور ضروری تربیتی پروگرام بھی کامیابی کے ساتھ مکمل کیے ہیں۔