لاہور: فاسٹ بولر محمد عامر کی ٹیسٹ کرکٹ سے ریٹائرمنٹ کے بعد وہاب ریاض نے بھی ٹیسٹ کرکٹ کو خیرباد کہنے کا فیصلہ کرلیا۔
تفصیلات کے مطابق قومی کرکٹ ٹیم کے فاسٹ بولر وہاب ریاض نے ٹیسٹ کرکٹ سے ریٹائرمنٹ کا فیصلہ کرلیا ہے، سدرن پنجاب ٹیم ذرائع کا کہنا ہے کہ وہاب ریاض نے قائد اعظم ٹرافی کے لیے لگائے گیے کیمپ میں رپورٹ نہیں کیا ہے۔
سدرن پنجاب ٹیم ذرائع کا کہنا ہے کہ وہاب ریاض مشاورت کے بعد باقاعدہ ٹیسٹ کرکٹ کو خیرباد کہنے کا اعلان کریں گے۔
ذرائع کا کہنا ہے کہ وہاب ریاض نے ٹیسٹ کرکٹ سے ریٹائرمنٹ کا فیصلہ پچھلے ماہ کینیڈٰن لیگ کے دوران کرلیا تھا۔
فاسٹ بولر وہاب ریاض نے 27 ٹیسٹ میچز میں قومی ٹیم کی نمائندگی کی اور 83 وکٹیں حاصل کیں، انہوں کی بہترین بولنگ ایک اننگز میں 63 رنز دے کر پانچ وکٹیں ہیں۔
مزید پڑھیں: فاسٹ باؤلر محمد عامر نے ٹیسٹ کرکٹ سے ریٹائر منٹ لے لی
وہاب ریاض ںے اپنا آخری ٹیسٹ میچ میں اکتوبر 2018 میں کینگروز کے خلاف کھیلا تھا۔
واضح رہے کہ اس سے قبل فاسٹ بولر محمد عامر نے 27 سال کی عمر میں ٹیسٹ کرکٹ کو خیرباد کہہ دیا تھا، وسیم اکرم، شعیب اختر، رمیز راجہ ودیگر سابق کرکٹرز نے عامر کی ریٹائرمنٹ کے فیصلے پر مایوسی کا اظہار کیا تھا۔
کرکٹ تجزیہ کاروں کا کہنا تھا کہ محمد عامر کی ریٹائرمنٹ کے بعد وہاب ریاض اور حسن علی بھی ٹیسٹ کرکٹ چھوڑ دیں گے، اب خبریں یہی ہیں کہ وہاب ریاض نے ٹیسٹ کرکٹ کو خیرباد کہنے والے ہیں۔
