کراچی: قومی کرکٹ ٹیم کے سابق کپتان اور بولنگ کوچ وقار یونس نے سوشل میڈیا چھوڑنے کا اعلان کردیا۔
اے آر وائی نیوز کی رپورٹ کے مطابق پاکستان کرکٹ ٹیم کے بولنگ کوچ وقار یونس نے سماجی رابطے کی ویب سائٹ ٹویٹر پر ایک ویڈیو پیغام میں سوشل میڈیا چھوڑنے کا اعلان کیا۔
وقار یونس نے کہا کہ انہیں بہت افسوس کے ساتھ کہنا پڑر ہا ہے کہ کسی نے ان کا ٹویٹر اکاؤنٹ ہیک کیا اور اس سے ایک انتہائی نازیبا ویڈیو کو لائیک کیا جو ان کے لیے شرمندگی کا باعث بنا۔
بولنگ کوچ وقار یونس نے کہا کہ وہ سمجھتے تھے کہ سوشل میڈیا رابطہ کرنے کا ذریعہ ہے لیکن وہ شخص تو باز نہیں آئے گا تاہم انہوں نے فیصلہ کرلیا ہے کہ آئندہ سوشل میڈیا استعمال نہیں کریں گے۔
— Waqar Younis (@waqyounis99) May 29, 2020
انہوں نے کہا کہ مجھے اپنی فیملی زیادہ عزیز ہے اس لیے میں آئندہ سوشل میڈیا استعمال نہیں کروں گا، اگر میرے اس فیصلے سے کسی کو تکلیف ہوئی ہو تو معذرت خواہ ہوں۔
واضح رہے کہ وقار یونس نے ٹویٹر کا استعمال تاخیر سے کیا تھا وہ اب بھی کبھی کبھار ہی اس پر اپنی رائے کا اظہار کرتے تھے لیکن سوشل میڈیا ان کے لیے مشکل کا باعث بن گیا اور آخرکار مایوسی کے عالم میں انہوں نے سوشل میڈیا سے کنارہ کشی اختیار کرلی۔
وقار یونس کے اکاؤنٹ سے لائیک کی جانے والی نازیبا ویڈیو دیکھتے ہی دیکھتے وائرل ہوگئی تھی جس کی وجہ سے انہیں خاصی تنقید کا سامنا کرنا پڑا جبکہ وقار یونس نے خود وہ ویڈیو لائیک نہیں کی تھی ان کا اکاؤنٹ ہیک ہوگیا تھا جس کی انہیں وضاحت کرنا پڑی۔
