کراچی: شہر قائد کے معروف آرٹسٹ وصی حیدر نے پیپلز اسکوائر پر 32 فٹ کا طویل میورل پینٹ کر دیا۔
تفصیلات کے مطابق کراچی کے علاقے پیپلز اسکوائر پر معروف پینٹر وصی حیدر اور ان کی ٹیم خالد سلیم اور فرخ نسیم نے شان دار دیوار گیر فن پارہ تخلیق کر دیا ہے۔
فن پارے میں کراچی کے تاریخی مقامات کو پینٹ کیا گیا ہے، یہ فن پارہ 32×10.9 فٹ طویل ہے، وصی حیدر کا کہنا ہے کہ اس میورل میں شہر قائد کے ورثے کو پیش کیا گیا ہے۔
فائن آرٹ کا یہ فن پارہ 13 دنوں میں تخلیق کیا گیا ہے، سندھ گورنمنٹ کے اس پروجیکٹ میں کراچی کے تاریخی مقامات کو پینٹ کیا گیا، جن میں موہٹہ پیلس، بلدیہ کی عمارت، فریئر ہال، سینٹ جوزف کے علاوہ کراچی میں چلنے والی قدیم ٹرام شامل ہیں۔
یہ میورل فائن آرٹ ایمپریشنزم کا ایک نفیس نمونہ ہے، ایمپریشنسٹ آرٹسٹ وصی حیدر کا کہنا ہے کہ اس فن پارے کو پینٹ کرتے ہوئے انھیں بہت مسرت حاصل ہوئی، دیوار بہت بڑی تھی اس لیے اپنے آرٹسٹ دوستوں کو بھی شامل کیا۔
واضح رہے کہ سندھ حکومت کی جانب سے اس فن پارے کی اوپننگ 14 اگست کو رکھی گئی تھی، فن کاروں نے 13 دن کے اندر وقت پر کام مکمل کر دیا، وصی حیدر نے بتایا کہ انھوں نے فن پارے پر شام کے بعد صبح 4 بجے تک کام کیا، کیوں کہ شہر کا موسم اچھا ہو جاتا تھا، دیوار اتنی بڑی تھی کہ ٹرام کے عکس کو پینٹ کرنے کے لیے پروجیکٹر کا استعمال بھی کرنا پڑا۔
آج ترجمان حکومت سندھ مرتضی وہاب نے ایک ٹوئٹ میں کہا ہے کہ 14 اگست پر سندھ حکومت نے عوام کو 3 منصوبوں کا تحفہ دیا، جن میں حیدرآباد میں نئی این آئی سی وی ڈی کی عمارت، کراچی میں پیپلز اسکوائر اور جہانگیر پارک کی سولرائزیشن شامل ہیں۔
On 14.08.2020, #SindhGovt gave 3 new projects to the people 1) New Building of NICVD, Hyderabad, 2) #PeoplesSquare Karachi & 3) Solarization of Jahangir Park. Yet the performance of #PPP is questioned pic.twitter.com/ZEXbCTZfTX
— SenatorMurtaza Wahab (@murtazawahab1) August 16, 2020
