کراچی: پاکستانی کرکٹ ٹیم کے سابق کپتان وسیم اکرم اور آل راؤنڈر عماد وسیم نے عمران خان ریلیف فنڈ میں دس، دس لاکھ روپے دینے کا اعلان کردیا۔
وزیراعظم کرونا ریلیف فنڈ کے حوالے سے اے آر وائی نیٹ ورک نے خصوصی نشریات کا اہتمام کیا جس میں اہم شخصیات نے بذریعہ ٹیلی فون شرکت کر کے عطیات دینے کا اعلان کیا جبکہ وزیراعظم عمران خان نے بھی بذریعہ نشریات قوم کے سامنے اہم باتیں پیش کیں۔
ٹیلی تھون کی میزبانی کے فرائض وسیم بادامی، فہد مصطفیٰ اور اقرار الحسن نے انجام دیے۔ اے آر وائی ڈیجیٹل نیٹ ورک کے صدر اور سی ای او سلمان اقبال اور اے آر وائی گروپ کی جانب سے ساڑھے چار کروڑ روپے مالیت کی ٹیسٹنگ کٹس، سوٹس بھی ریلیف فنڈز میں دینے کا اعلان کیا گیا۔
قومی کرکٹ ٹیم کے سابق کھلاڑی باسط علی نے اپنے یوٹیوب چینل کی آئندہ تین ماہ کی کمائی وزیراعظم کرونا ریلیف فنڈز میں دینے کا اعلان کیا۔
لیجنڈری کھلاڑی وسیم اکرم اور عماد وسیم نے وزیراعظم کرونا ریلیف فنڈز میں دس، دس لاکھ روپے دینے کا اعلان کیا جبکہ اس سے قبل قومی ٹیسٹ کرکٹ ٹیم کے کپتان اظہر علی بھی 10 لاکھ روپے کی رقم دینے کا اعلان کرچکے ہیں۔
مزید پڑھیں: اے آر وائی نیٹ ورک ٹیلی تھون، معروف شخصیات نے وزیراعظم فنڈز میں بھاری رقم عطیہ کردی
اظہر علی نے پیر کے روز اعلان کیا تھا کہ وہ پاکستان کرکٹ بورڈ سے حاصل ہونے والی آمدنی میں سے پانچ لاکھ جبکہ باقی پانچ لاکھ روپے عطیات جمع کر کے وزیر اعظم فنڈز میں دیں گے۔
I will be donating pkr one million to the Prime Minister relief fund for COVID19. In these testing times we should all play our part in what ever capacity.. May Allah forgive us and protect everyone Ameen
— Azhar Ali (@AzharAli_) March 30, 2020
یاد رہے کہ وزیراعظم عمران خان نے کرونا وائرس کی وبا سے نمٹنے کے لیے ریلیف فنڈز قائم کرنے کا اعلان کیا اور پاکستانیوں سے اپیل کی کہ وہ دل کھول کر عطیات دیں تاکہ اس مشکل وقت میں غریبوں یا متوسط طبقے کے لوگوں کی پریشانی دور کی جاسکے۔