فیصل آباد: صوبہ پنجاب کے شہر فیصل آباد میں مسخرے چور کی اے ٹی ایم میں واردات کی سی سی ٹی فوٹیج سامنے آگئی۔
تفصیلات کے مطابق فیصل آباد کے علاقے کچہری بازار میں چور اے ٹی ایم میں واردات کے لیے گیا اور عجیب و غریب حرکتیں کرتا رہا، چور نے سی سی ٹی وی کیمرے کی جانب دیکھتے ہوئے منہ بھی چڑایا۔
ویڈیو میں دیکھا جاسکتا ہے کہ ملزم نے مشین کو ہیک کرکے شہریوں کے کارڈ پھنسائے اور ایک بار منہ چڑایا اس دوران ملزم نے اے ٹی ایم مشین کے ساتھ زور آزمائی شروع کی۔
چور نے کچھ دیر کی کوشش کے بعد اے ٹی ایم مشین توڑ کر کارڈ نکالا اور اطمینان سے چلا گیا۔
نمائندہ اے آر وائی نیوز قمر زمان کے مطابق ملزم کی طریقہ واردات سے یہ لگتا ہے کہ جیسے وہ پولیس اور قانون نافذ کرنے والے اداروں کو چیلنج کررہا ہے کہ وہ اسے پکڑ کر دکھائیں۔
رپورٹ کے مطابق سمیع اللہ نامی شہری نے پولیس کو درخواست دی ہے کہ اے ٹی ایم کارڈ چور نے ان کے اکاؤنٹ سے 64 ہزار روپے کی رقم نکالی ہے لیکن پولیس نے ابھی تک مقدمہ درج نہیں کیا۔