واشنگٹن: امریکا نے بھی حکومت پاکستان کے احساس اسکالر شپ پروگرام کی تعریف کر دی ہے، نائب امریکی وزیر خارجہ کا کہنا تھا کہ نوجوان خواتین کو با اختیار بنانے پر حکومت پاکستان کے اقدامات کو امریکا سراہتا ہے۔
تفصیلات کے مطابق نائب وزیر خارجہ ایلس ویلز نے ٹویٹر کے ذریعے کہا ہے کہ ہم پاکستان کے اسکالر شپ پروگرام کو سپورٹ کرتے ہیں، تعلیم نوجوانوں کی ترقی میں کلیدی کردار ادا کرتی ہے، ہم خواتین کے بین الاقوامی دن کے موقع پر احساس تعلیمی وظائف کے ساتھ بھرپور تعاون کرتے ہیں۔
Education is the key to advancement in the lives of young people. Great news during #InternationalWomensHistoryMonth! We support @Ehsaas_Pk’s new educational scholarships, which builds on @USAID_Pakistan scholarships, and appreciate its emphasis on empowering young women. AGW
— State_SCA (@State_SCA) March 4, 2020
ایلس ویلز نے ٹویٹ میں لکھا کہ احساس اسکالر شپ نئی تعلیمی اسکالر شپ ہے، جو یو ایس ایڈ پاکستان اسکالر شپس کی طرز پر تشکیل دی گئی ہے، ہم نوجوان خواتین کو با اختیار بنانے پر حکومت پاکستان کے اقدامات کو سراہتے ہیں۔
ملکی تاریخ کے سب سے بڑے اسکالرشپ پروگرام کا آغاز
یاد رہے کہ وزیر اعظم عمران خان نے ہر سال 50 ہزار اسکالر شپس دینے کا اعلان کیا ہے، دو دن قبل وزیر اعظم نے احساس انڈر گریجویٹ اسکالر شپ پروگرام کا آغاز کیا، جس کے تحت مستحق ذہین طلبہ میں وظائف دیے جا رہے ہیں، احساس اسکالر شپ پروگرام پاکستان کی تاریخ کا سب سے بڑا پروگرام ہے۔
تعلیمی سال 19-2020 کے پہلے مرحلے کی احساس اسکالر شپس کے لیے سالانہ 6 ارب روپے مختص کیے گئے ہیں، احساس انڈر گریجویٹ 4 سالہ پروگرام کے لیے 24 ارب کے وظائف دیے جائیں گے۔
