The news is by your side.

Advertisement

ملک بھر میں بارش اور برفباری کے نئے سلسلے کی پیشگوئی ،کراچی میں بدھ کو بوندا باندی کا امکان

اسلام آباد : ملک بھر میں بارش کا نیا سلسلہ شروع ہونے کی پیشگوئی کردی گئی ہے جبکہ کوئٹہ میں ہلکی بارش اور بلوچستان کے مختلف علاقوں میں برفباری جبکہ کراچی میں بھی سردی بڑھنے کا امکان ہے۔

محکمہ موسمیات کے مطابق آج سے بارش اور برفباری کا نیا اسپیل کوئٹہ میں داخل ہورہا ہے ، محکمہ موسمیات کا کہنا ہے کہ بدھ سے کراچی میں بھی بوندا باندی ہوگی جبکہ پنجاب میں بھی مزید بارشیں اور پہاڑوں پر برف باری ہوگی۔

آج مالاکنڈ ڈویژن میں کئی مقامات پر بارش ہوئی جس نے سردی میں اضافہ کردیا۔

آئندہ 24گھنٹے میں بلوچستان میں اکثر مقامات پر جبکہ خیبرپختونخوا، فاٹا، اسلام آباد، راولپنڈی، گوجرانوالہ، سرگودھا، ڈی جی خان، سکھر، لاڑکانہ ڈویژن، گلگت بلتستان اور کشمیر میں کہیں کہیں گرج چمک کے ساتھ بارش اور پہاڑوں پر برفباری کا امکان ہے۔

محکمہ موسمیات کے مطابق رواں ہفتے کے دوران ملک کے مختلف حصوں میں مزید بارشوں اور پہاڑوں پر مزید برفباری کی پیشگوئی کی ہے، پیر سے بدھ کے دوران بلوچستان کے بیشتر علاقوں میں بارش جبکہ کوئٹہ ، ژوب اورقلات ڈویژن کے پہاڑوں پر مزید برفباری کا امکان جبکہ منگل اور بدھ کے روز مکران اور قلات ڈویژن میں کہیں کہیں موسلادھار بارش کی پیشگوئی کی گئی ہے، جس کے باعث مقامی ندی نالوں میں طغیانی کا خدشہ ہے، منگل اور بدھ کے روز سندھ میں بھی کہیں کہیں بارش کی پیشگوئی کی گئی ہے۔

محکمہ موسمیات کا کہنا ہے کہ گزشتہ 24 گھنٹوں میں ملک کے بیشتر علاقوں میں موسم شدید سرد اور خشک رہا تاہم خیبرپختونخواہ: کالام، پٹن 03، چترال02، بلوچستان: دالبندین، کوئٹہ01، سندھ شہید بینظیرآباد میں01 ملی میٹر بارش کالام1.5 انچ، استور0.6انچ، مالم جبہ0.5 انچ برفباری ریکارڈ کی گئی۔

آج ریکارڈ کیےگئےسرد ترین مقامات کے درجہ حرارت: اسکردو منفی09، پاراچنار منفی07، قلات، مالم جبہ، گوپس منفی06، استور، بگروٹ منفی03 ڈگری سینٹی گریڈ ریکارڈ کیا گیا۔

Print Friendly, PDF & Email

Comments

comments

یہ بھی پڑھیں