ویسٹ انڈیز نے پہلے ٹی 20 میچ میں نیوزی لینڈ کو ہوم گراؤنڈ پر 7 رنز سے شکست دے دی۔
آکلینڈ میں کھیلے گئے میچ میں ویسٹ انڈیز کی جانب سے دیے گئے 165 رنز کے تعاقب میں کیوی ٹیم 9 وکٹوں کے نقصان پر 157 رنز بناسکی۔
کپتان مچل سینٹنر کے 28 گیندوں پر 55 رنز رائیگاں گئے، ٹم رابنسن 27 رنز بنا کر آؤٹ ہوئے، راچن رویندرا نے 13 رنز بنائے، ڈیون کانوے 13 رنز بنا کر بولڈ ہوئے۔
ویسٹ انڈیز کی جانب سے جیڈن سیلز اور روسٹن چیز نے تین، تین کھلاڑیوں کو آؤٹ کیا۔
اس سے قبل ویسٹ انڈیز نے کپتان شائے ہوپ کی 53 رنز کی اننگز کی بدولت نیوزی لینڈ کو جیت کے لیے 165 رنز کا ہدف دیا تھا۔
روسٹن چیز نے 28 رنز بنائے، رومین پاول 23 گیندوں پر 33 رنز بنا کر نمایاں رہے۔
نیوزی لینڈ کی جانب سے جیکب ڈفی اور زیک فوکس نے دو، دو وکٹیں حاصل کیں، جمی نیشم نے ایک کھلاڑی کو آؤٹ کیا۔
