خالی پیٹ یہ غذائیں کھانا نقصان کا سبب -
The news is by your side.

Advertisement

خالی پیٹ یہ غذائیں کھانا نقصان کا سبب

صحت مند غذائی اشیا اور پھل و سبزیاں ویسے تو صحت کے لیے فائدہ مند ہیں، لیکن بعض اوقات یہ جسم کو نقصان بھی پہنچا سکتی ہیں۔

ایسا اس وقت ہوتا ہے جب ہمارا معدہ خالی ہوتا ہے۔ ہماری کھائی جانے والی غذائیں خالی معدے میں عام حالات کے مقابلے میں مختلف طرح سے اثر انداز ہوتی ہیں۔

کچھ غذائیں خالی پیٹ کھانے سے اسہال، تیزابیت اور طبیعت خرابی کا سبب بن سکتی ہیں۔ اسی طرح کچھ غذائیں نہار منہ کھانا جسم کے لیے فائدہ مند ہے۔

لہٰذا آج ہم نے نہار منہ فائدہ مند اور نقصان دہ ایسی ہی کچھ غذاؤں کی فہرست مرتب کی ہے۔


خالی پیٹ نقصان پہنچانے والی غذائیں

ٹماٹر

بعض افراد نہار منہ ٹماٹر کھانے کو ترجیح دیتے ہیں لیکن خالی معدے میں ٹماٹر بے حد تیزابیت کا سبب بن سکتے ہیں۔


کافی

صبح اٹھتے ہی سب سے پہلے کافی پینا بھی اکثر افراد کی ایک عام عادت ہے لیکن صبح صبح خالی پیٹ کافی پینا آپ کو متلی اور معدے کی گڑ بڑ میں مبتلا کرسکتی ہے۔


ترش پھل

صبح صبح ترش پھل جیسے نارنگی یا لیموں کھانا غذائی نالی میں جلن کا سبب بن سکتے ہیں۔


مشروبات

کسی بھی قسم کے مشروبات بشمول تازہ پھلوں کے جوسز سے دن کا آغاز کرنا برا آئیڈیا ہے۔ جوس کے غذائی اجزا جلدی ہضم ہو کر جسم کا حصہ بن جاتے ہیں جس کے بعد آپ تھوڑی دیر بعد پھر سے بھوک محسوس کرنے لگتے ہیں۔


سافٹ ڈرنکس

ویسے تو سافٹ ڈرنکس کا استعمال کم سے کم کرنا چاہیئے لیکن خالی پیٹ ان کا استعمال معدے اور غذائی نالیوں کی دیواروں کو نقصان پہنچا کر جلن کا سبب بن سکتا ہے۔


مصالحہ دار غذائیں

ناشتے میں مصالحہ دار اور مرغن غذائیں کھانا آپ کو معدے کی جلن اور گیسٹرک میں مبتلا کرسکتا ہے۔


دہی

ویسے تو دہی کا استعمال صحت کے لیے فائدہ مند ہے لیکن ناشتے کا آغاز دہی سے نہیں کرنا چاہیئے۔

خالی معدے کی تیزابیت دہی کے تمام فائدہ مند اجزا کو ضائع کردیتی ہے۔ البتہ ناشتے میں کچھ اور ہلکا پھلکا کھا کر آخر میں، یا ناشتے کے ایک سے دو گھنٹے کے اندر دہی کھایا جاسکتا ہے۔


خالی پیٹ فائدہ پہنچانے والی غذائیں

انڈے

ناشتے کے لیے انڈے بہترین غذا ہیں۔ یہ جسم کو درکار غذائی اجزا کی ضروریات کو پورا کرتے ہیں اور سیر ہونے کا احساس دلاتے ہیں۔ اس ضمن میں ابلے یا تلے ہوئے انڈے دونوں ہی مفید ہیں۔


دلیہ

ناشتے کے لیے دلیہ بھی ایک بہترین غذا ہے۔ یہ معدے کو ایک حفاظتی تہہ فراہم کرتا ہے جبکہ معدے کی دیواروں کو بھی تیزابی اجزا سے محفوظ رکھتا ہے۔


تربوز

تربوز نہ صرف جسم کی غذائی ضروریات پوری کرتا ہے بلکہ جسم کو درکار پانی کی طلب کو بھی پورا کرتا ہے۔ اس میں موجود لائیکو پین دل، جلد اور شوگر کے لیے فائدہ مند ہے۔


بلو بیریز

تمام اقسام کی بیریز جسم کو فائدہ پہنچاتی ہیں تاہم ناشتے میں بلو بیریز کا استعمال بے حد فائدہ مند ہے۔ یہ خون کے بہاؤ کو معمول پر رکھتی ہیں اور یادداشت میں اضافے کا سبب بنتی ہیں۔


خشک میوہ جات

خشک میوہ جات السر کا خطرہ کم کرتی ہیں کیونکہ یہ معدے کی اپنی تیزابیت کو معمول کی سطح پر رکھتی ہیں۔ ناشتے میں خشک میوہ جات کا استعمال آپ کو سیر ہونے کا احساس دلاتا ہے۔


شہد

ناشتے میں شہد کھانا نظام ہاضمہ اور قوت مدافعت کو بہتر بناتا ہے اور جسم کو مختلف وائرس اور اور بیکٹریا سے بچاتا ہے۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

Comments

comments

یہ بھی پڑھیں