نئی دہلی: بھارت میں اے ٹی ایم مشین کے ذریعے لوگوں کے بینک اکاؤنٹ سے لاکھوں روپے بٹورنے والا ملزم پکڑا گیا جس نے اپنا طریقہ واردات بھی بتا دیا۔
غیرملکی خبررساں ادارے کی رپورٹ کے مطابق بھارتی پولیس نے نوائیڈا شہر سے اس شاطر ملزم کو گرفتار کیا جس نے اب تک کئی بینک صارفین کا مال ہڑپ کیا، جبکہ گرفتار شہری کا دوسرا ساتھی تاحال فرار ہے۔
رپورٹ کے مطابق ناظم نامی ملزم نے انکشاف کیا ہے کہ اس کا ساتھی اے ٹی ایم میشن میں سوائپ کی جگہ اسکیمر ڈیوائس اور چھوٹا کیمرہ نصب کرتا تھا جس کے ذریعے ہم صارفین کا پن کوڈ اور دیگر اہم معلومات حاصل کرلیتے تھے۔
ملزم کے مطابق تمام ڈیٹا حاصل کرنے کے بعد کلون ڈیبٹ کارڈ تیار کرواتے تھے اس طرح صارفین کے بینک اکاؤنٹ تک رسائی حاصل ہوجاتی اور لاکھوں روپے نکال لیتے تھے، اب تک 40 لاکھ کی رقم کا فراڈ کرچکے ہیں۔
پولیس نے ملزم سے مختلف بینکوں کے کلون ڈیبٹ کارڈز سمیت متعدد سامان قبضے میں لے لیا ہے۔