واٹس ایپ پر اکثر اوقات جعلی پیغامات گردش کرتے رہتے ہیں جن میں انعام یا تحائف کا لالچ دیا جاتا ہے، اب ایسا ہی ایک اور ان دنوں پیغام گردش کر رہا ہے جس میں ای کامرس کمپنی امیزون کا نام استعمال کیا جارہا ہے۔
بین الاقوامی ویب سائٹ کے مطابق ان دنوں ایک جعلی واٹس ایپ میسج اکثر صارفین کو موصول ہورہا ہے جس میں بتایا جارہا ہے کہ امیزون اپنی 30 ویں سالگرہ کے موقع پر مفت تحفے تقسیم کررہا ہے۔
تحفے کے طور پر کمپنی اسمارٹ فون دے رہی ہے۔
جب صارفین اس میسج کو کلک کرتے ہیں تو لکھا آتا ہے کہ مبارک ہو آپ کو ہمارے سروے میں حصہ لینے کے لیے منتخب کیا گیا ہے۔ اس کے ساتھ ہی ہواوے کا ایک مہنگا اسمارٹ فون جیتنے کا بتایا جاتا ہے۔
میسج میں کہا جاتا ہے کہ ہر بدھ کو ہم رینڈم طریقہ سے 100 صارفین کا انتخاب کرکے انہیں یہ تحفہ جیتنے کا موقع دیتے ہیں، اس سروے کا مقصد ہمارے صارفین کے لیے سروس کی کوالٹی میں بہتری اور آپ کی شراکت داری کو 100 فیصد ریوارڈ دینا ہے۔
ساتھ ہی کہا جاتا ہے کہ اس سروے کا جواب دینے کے لیے آپ کے پاس اتنے منٹ موجود ہیں، جلدی کیجیئے، دستیاب انعام کی تعداد محدود ہے۔
ماہرین کا کہنا ہے کہ اس طرح کے میسیج کے لنک پر کلک کرنے سے گریز کریں، یہ ایک جعلی میسج ہے جہاں سائبر کرمنلز آپ کی ذاتی تفصیلات کی تلاش میں ہیں۔
ماہرین کے مطابق آپ کے دستیاب کردہ ڈیٹا کا استعمال وہ آپ کو کال کرنے، دھوکہ دینے یا شناخت کی چوری کے لیے بھی کر سکتے ہیں۔
ٹیکنالوجی ماہرین کا کہنا ہے کہ اس طرح کے میسج موصول ہونے پر انہیں فوری طور پر رپورٹ اور بلاک کریں۔
