سان فرانسسکو: پیغام رسانی کے لیے استعمال ہونے والی معروف موبائل ایپلی کیشن واٹس ایپ نے اینڈ ٹو اینڈ انکرپشن فیچر کو مزید بہتر بنانے پر کام شروع کردیا۔
تفصیلات کے مطابق واٹس ایپ کمپنی کی جانب سے ایک فیچر ایکسپائرنگ میڈیا پر بھی کام کیا جارہا ہے جو اس وقت اینڈرائیڈ کے بیٹا ورژن میں دستیاب ہے۔
رپورٹ کے مطابق جب یہ فیچر تمام صارفین کو دستیاب ہوگا تو ان کے پاس کسی بھی شیئر کی جانے والی میڈیا فائلز کو ایک مخصوص وقت پر ایکسپائر کرنے کا آپشن ہوگا۔
جس فرد کو وہ ایکسپائرنگ میڈیا میسج ملے گا وہ اسے ایک بار دیکھ سکے گا اور جیسے ہی چیٹ ونڈو سے باہر نکلے گا وہ میسج غائب ہوجائے گا۔
مزید پڑھیں: واٹس ایپ جلد فیچرز کا گلدستہ پیش کرے گا
واٹس ایپ میں اس فیچر پر گزشتہ سال سے کام ہورہا ہے تاہم ابھی یہ واضح نہیں کہ اسے کب تک متعارف کروایا جاسکتا ہے۔
گزشتہ سال جب یہ بیٹا ورژن میں نظر آیا تھا تو اس وقت یہ صرف گروپ چیٹ میں دستیاب تھا اور اس میں پیغام 5 سیکنڈ یا ایک گھنٹے بعد ڈیلیٹ ہوجاتا تھا۔
واضح رہے کہ یہ فیچر اسنیپ چیٹ پر موجود فیچر سے ملتا جلتا ہے جسے بعد میں انسٹاگرام نے بھی کاپی کیا تھا۔
ٹیلیگرام نے یہ فیچر اپنی ایپ میں پہلے ہی متعارف کرا دیا ہے اور اب فیس بک اسے اپنی مقبول ترین میسجنگ ایپ میں اسے پیش کرنے والی ہے۔
