مسیجنگ ایپلی کیشن واٹس ایپ نے اپنے صارفین کیلئے ایک اور جدید فیچر متعارف کرایا ہے جس کے تحت تصویر سے تحریر اخذ کرکے اسے کاپی کیا جاسکتا ہے۔
موجودہ دور میں اسمارٹ فون ہر ایک کی ضرورت بن چکا ہے جس میں باہمی رابطوں کی ایپ ’’واٹس ایپ‘‘ صارفین میں سب سے زیادہ مقبول ہے جو دنیا کے ہر کونے میں با آسانی رابطے کا بڑا ذریعہ ہے۔
واٹس ایپ کی اندرونی خبریں دینے والی ویب سائٹ ’ویب بی ٹا انفو‘ کی رپورٹ کے مطابق واٹس ایپ نے اپنے صارفین کی سہولت کے لیے ایک اور جدید فیچر متعارف کرادیا ہے۔
ویب سائٹ کے مطابق جن صارفین کو یہ فیچردستیاب ہے وہ تحریرلکھی تصویرکوکھول کر ظاہرہونے والے ایک بٹن کی مدد سے ٹیکسٹ کو کاپی کرسکیں گے۔
واٹس ایپ کی جانب سے متعارف کرایا جانے والا یہ نیا فیچر فی الحال آئی فون صارفین کے لیے جاری کیا گیا ہے۔
اس نئے فیچرکو آئی او ایس 16 یا اس سے اگلے ورژن کا آپریٹنگ سسٹم استعمال کرنے والے صارفین استعمال کر سکیں گے۔
تاہم، ان تصاویر سے تحریر اخذ نہیں کی جاسکے گی جو صرف ایک بار دیکھے جانے والے آپشن کے تحت بھیجی جائیں گی۔
