تازہ ترین

واٹس ایپ کا اہم ڈیسک ٹاپ فیچر متعارف کروائے جانے کا امکان

میسجنگ ایپلی کیشن واٹس ایپ مختلف نئی اپڈیٹس کی آزمائش کرتی رہتی ہے اور اب جلد ہی اس کے ویب ورژن میں ایک اور نئی فیچر اپڈیٹ پیش کی جانے والی ہے۔

بین الاقوامی میڈیا کے مطابق رواں سال ہی واٹس ایپ نے گروپ کالز کی حد 4 سے بڑھا کر 16 کی تھی اور اب بہت جلد کالنگ فیچر ڈیسک ٹاپ ورژن میں بھی دستیاب ہوگا۔

برطانوی روزنامے دی گارڈین کے ایلکس ہیرن نے ٹوئٹر پر ایک اسکرین شاٹ شیئر کیا جس میں وائس اور ویڈیو کال کے نئے بٹن ڈیسک ٹاپ ورژن میں نظر آرہے ہیں۔

اس فیچر کی آزمائش واٹس ایپ کی جانب سے بیٹا ورژن میں کی جارہی ہے مگر اب تک یہ عام صارفین کے لیے دستیاب نہیں۔ یہ واضح نہیں کہ یہ فیچر کب تک دستیاب ہوگا مگر امکان ہے کہ جلد ایسا ہوسکتا ہے۔

اس سے قبل اکتوبر میں واٹس ایپ اپ ڈیٹس پر نظر رکھنے والی سائٹ نے بھی اس حوالے سے بتایا تھا۔ اس وقت ویب سائٹ نے واٹس ایپ ویب میں وائس اور ویڈیو کالنگ کے آپشن کے اسکرین شاٹس شیئر کیے تھے جو حالیہ اسکرین شاٹ سے ملتے جلتے تھے۔

اس فیچر میں جب واٹس ایپ ویب پر کال کی جائے گی تو ایک پوپ اپ ونڈو نظر آئے گی جس پر یوزر نیم، پروفائل کی تصویر اور کال، ویڈیو یا آڈیو اور میوٹ بٹنز ہوں گے۔

Comments

- Advertisement -