لندن: جدید ٹیکنالوجی کی مدد سے تیار کیے جانے والے برقی آلات عمومی طور پر بہت نازک ہوتے ہیں جن کی حفاظت کو یقینی بنانے کے لیے بالخصوص انہیں پانی سے بچایا جاتا ہے۔
اسی طرح موبائل فون اگر پانی میں گرجائے تو اس کے صحیح سلامت رہنے کے بہت کم ہی امکانات ہوتے ہیں۔ برطانیہ میں ایسا منفرد واقعہ پیش آیا جہاں دو مہینے تک موبائل فون دریا میں گرنے کے باوجود صحیح سلامت مل گیا۔
موبائل کی مالکن کا کہنا ہے کہ وہ سیر وتفریح کے لیے دریا گئی اور بگلوں کو دانا ڈال رہی تھی کہ اچانک آئی فون 8 پانی میں گر گیا اور لاپتہ ہوگیا۔ کافی تلاش کے باوجود میرا فون نہیں ملا بلآخر دو مہینے بعد مل گیا۔
انہوں نے بتایا کہ وہ اپنے منگیتر کے ہمرا دوبارہ جب اسی دریا سیروتفریح کے لیے گئی تو دریا کے کنارے موبائل فون پڑا ملا، موبائل چلانے پر پتا چلا کہ یہ صحیح سلامت ہے، مجھے اب بھی یقین نہیں آرہا کہ یہ سچ ہے۔
خاتون کا مزید کہنا تھا کہ اس موبائل میں میری قیمتی تصاویر اور مختلف فائل بھی تھیں، موبائل لاپتہ ہونے پر میں گہرے صدمے کا شکار تھی، فون کے دوبارہ ملنے پر مجھے بہت خوشی ہوئی۔
