کراچی: افغانستان میں پھنسے پاکستانیوں کو قومی ایئرلائن کے ذریعے وطن واپس لانے کا آپریشن تاحال معطل ہے۔
تفصیلات کے مطابق افغان دارالحکومت کابل میں قائم حامد کرزئی ایئرپورٹ پر ابتر صورت حال کے باعث پاکستانی انٹرنیشنل آیئرلائن(پی آئی اے) نے اپنا سفری مشن معطل کر رکھا ہے۔
پی آئی اے ترجمان کا کہنا ہے کہ پروازوں کی بحالی سے متعلق کچھ کہنا قبل ازوقت ہے، کابل ایئرپورٹ پر فضائی آپریشن بحال ہونے پر پروازیں شروع کردیں گے۔
ترجمان نے بتایا کہ پروازوں کے لیے ہماری تیاری پوری طرح مکمل ہے۔
دوسری جانب ایک رپورٹ میں دعویٰ کیا گیا ہے کہ امریکا کے زیر انتظام کابل ایئرپورٹ کھول دیا گیا اور فضائی آپریشن بھی بحال ہوچکی ہے۔
کابل کیلیے خصوصی پروازوں کا اعلان
امریکی جنرل ہینک ٹیلر کا کہنا تھا کہ امریکی فوجی دستے کابل ایئرپورٹ پرسیکیورٹی فراہم کر رہے ہیں، ڈھائی ہزار امریکی فوجی کابل میں موجود ہیں۔
خیال رہے کہ گزشتہ دو روز سے کابل ایئرپورٹ کسی بس اڈے کا منظر پیش کررہا ہے، بغیر کسی سفری دستاویزات کے جس کا جہاں دل کیا اسی جہاز میں سوار ہوگیا۔ دھکا پیل اور افراتفری کے باعث کئی لوگ زخمی بھی ہوئے۔
