The news is by your side.

Advertisement

کرس گیل کس کھلاڑی کو ‘سانپ’ سمجھتے ہیں

جمیکا: ویسٹ انڈیز کے لیجنڈ کھلاڑی کرس گیل کو کیریبئن پریمیئر لیگ کی ٹیم جمیکا تلاواس سے باہر کر دیا گیا ہے، جس پر وہ غصے سے آگ بگولہ ہو گئے۔

تفصیلات کے مطابق جمیکا تلاواس نے کیریبئن پریمیئر لیگ کے اگلے ایڈیشن کے لیے بلے باز کرس گیل کو ٹیم میں شامل نہ کر کے انھیں غصہ دلا دیا، ٹیم سے باہر ہونے پر انھوں نے اسسٹنٹ کوچ اور سابق ٹیم میٹ رام نریش سروان کو آڑے ہاتھوں لے لیا۔

ویسٹ انڈیز کے دھماکا خیز اوپنر بلے باز کرس گیل نے اپنے یو ٹیوب چینل پر ایک پندرہ منٹ کی ویڈیو ریلیز کی، جس میں انھوں نے ویسٹ انڈیز کے سابق کپتان رام نریش سروان کو سانپ قرار دے دیا۔

کرس گیل نے سروان کو مخاطب کر کے کہا، تم کینہ پرور ہو، تم سانپ ہو، تم ابھی تک بڑے نہیں ہوئے، تم آج بھی لوگوں کی پیٹھ میں چھرا گھونپ دیتے ہو، تم آخر کب تبدیل ہوگے؟

کرس گیل نے سروان پر جمیکا تلاواس سے آؤٹ کرنے کا الزام لگاتے ہوئے ان کو کرونا وائرس سے بھی بدتر قرار دے دیا، انھوں نے ویڈیو میں کہا وہ کرونا وائرس سے بھی زیادہ خطرناک ہیں، سروان تلاواس ٹیم کا ہیڈ کوچ بننا چاہتا ہے لیکن میں نے انھیں براہ راست کہا کہ سروان تم اتنا تجربہ نہیں رکھتے کہ ہیڈ کوچ بنو، یہ کوئی آسان کام نہیں۔

کرس گیل کا کہنا تھا کہ ان کے ساتھ جو کچھ ہوا اس میں سروان کا بڑا ہاتھ ہے، ویڈیو میں انھوں نے کہا کہ سروان آپ نے میری سال گرہ پر کہا تھا کہ کس طرح ہم آگے بڑھ سکتے ہیں لیکن آپ سانپ ہیں، آپ کو پتا ہے کہ یہاں آپ پسندیدہ نہیں، بے شک میں 1996 کے دور کا آخری کھلاڑی ہوں جو اب بھی چل رہا ہے، مجھے لگتا ہے کہ ان لوگوں کی اس بات سے پریشانی ہے کہ گیل کھیل رہا ہے اور کیریئر میں کامیابی حاصل کر رہا ہے۔

انھوں نے کہا کہ سروان میں آپ سے نجات پالوں گا اور وقت آنے پر دیگر کھلاڑیوں سے بھی نمٹ لوں گا۔ خیال رہے کہ اب 2020 کے کیریبئن پریمیئر لیگ میں سینٹ لوسیا زوکس کی طرف سے ڈیرن سیمی اور ہیڈ کوچ اینڈی فلاور کی قیادت میں کھیلیں گے، جس کے ساتھ ان کا معاہدہ ہو گیا ہے۔

Comments

یہ بھی پڑھیں