واشنگٹن : امریکی فوڈ اینڈ ڈرگ اتھارٹی نے پانچ سے گیارہ سال کے بچوں کو فائزر ویکسین لگانے کی حمایت کردی۔
امریکا کے محکمہ صحت کی جانب سے پانچ سے گیارہ سال تک کی عمر کے بچوں کو کرونا ویکسین لگانے کا فیصلہ کرتے ہوئے حکمتِ عملی تیار کی گئی تھی۔
خبرایجنسی کی رپورٹ کے مطابق امریکا کی فوڈ اینڈ ڈرگ ایڈمنسٹریشن اتھارٹی نے پانچ سال سے گیارہ سال تک کی عمر کے بچوں کو کرونا سے بچاؤ کے لیے فائزر ویکسین لگانے کی حمایت کی ہے۔
ایف ڈی اے نے فیصلہ اکثریت رائے سے کیا، کیوں کہ بچوں کیلئے فائزر ویکسین کی افادیت نقصان سے کہیں زیادہ ہے۔
یاد رہے کہ فائزر نے 5 سے 11 سال کے بچوں کی ویکسینیشن کیلئے گزشتہ ماہ ٹرائلز جمع کرانے کے بعد اس کے استعمال اجازت مانگی تھی، جس پر ماہرین کے دو پینلز نے بحث کرنے کا اعلان کیا تھا۔
پہلے پینل نے فوڈ اینڈ ڈرگ ایڈمنسٹریشن کے زیر اہتمام ہفتے کو ملاقات کی جبکہ دوسرا سی ڈی سی کے تحت 2 اور 3 نومبر کو ملاقات کریگا۔
