لندن: برطانیہ میں کچھ مائیں اپنے بچوں کو کروناوائرس سے محفوظ رکھنے کے لیے دیسی ٹوٹکے اپنارہی ہیں۔
غیرملکی خبررساں ادارے کی رپورٹ کے مطابق ماؤں کا خیال ہے کہ پیاز بچوں کو کروناوائرس سے بچا سکتے ہیں۔ برطانیہ میں پیغام رسانی کی سب سے بڑی ایپلیکیشن واٹس ایپ کے ذریعے اس ٹوٹکے کو پھیلایا بھی جارہا ہے۔
ماؤں نے اس ٹوٹکے کو اپناتے ہوئے کمرے کے چاروں کو کونے میں ایک ایک پیاز رکھے اور یقین کا اظہار کیا کہ اب یہ پیاز بچوں کو کروناوائرس سے محفوظ رکھیں گے۔ خیال رہے کہ مذکورہ ٹوٹکا مفروضوں اور پرانی کہاوتوں پر مشتمل ہے جبکہ سائنس بھی ٹوٹکوں کو من گھڑت اور گڑھی ہوئی باتیں قرار دیتی ہے۔
واٹس ایپ کے ذریعے پھیلائے جانے والے اس ٹوٹکے میں ماؤں کو مشورہ دیا گیا ہے کہ وہ اس طرح پیاز کا استعمال کریں، پیاز میں بکٹیریا کو اپنے اندر سمونے کی صلاحیت موجود ہوتی ہے، جو ممکنہ طور پر کروناوائرس سے بچانے میں معاون ثابت ہوگی۔ سوشل میڈیا پر چند صارفین کا کہنا ہے کہ انہوں نے اپنی ماں کو بھی ایسا کرتا دیکھا ہے۔
ایک صارف نے لکھا کہ ان کی ماں کو یہ مشورہ واٹس ایپ کے ذریعے ملا جس کے بعد انہوں نے عمل کرنا شروع کردیا۔ بہت سے صارفین نے اس عمل پر سوالات اٹھاتے ہوئے اسے احمقانہ قرار دیا۔
