The news is by your side.

نواز اوبامہ ملاقات میں ایٹمی معاہدے سے متعلق بات چیت ہوگی، وائٹ ہاؤس

واشنگٹن : وائٹ ہاؤس کے ترجمان جوش آرنسٹ نے کہا ہے کہ آئندہ ہفتے وزیر اعظم نواز شریف کی واشنگٹن کے دورے کے موقع پر باراک اوبامہ اور نواز شریف کے درمیان ہونے والی ملاقات میں ایٹمی معاہدے سے متعلق بات چیت ہوگی، اور اس موقع پر ایٹمی ہتھیاروں کی سیکیورٹی کے حوالے سے بھی گفتگو کی جائے گی۔

یہ بات وائٹ ہاؤس کے ترجمان جوش آرنسٹ نے پریس بریفنگ میں کہی، انہوں نے کہا کہ پاکستان اور امریکا جوہری ہتھیاروں کی سکیورٹی کے سلسلے میں مذاکرات کرتے رہتے ہیں اور ان کے خیال میں دونوں ملکوں کے رہنماؤں کی ملاقات کے دوران اس معاملے پر بات چیت ہو گی۔

وزیر اعظم نواز شریف 20 اکتوبر کو 3 روزہ دورے پر امریکہ پہنچیں گے اور22 اکتوبر کو وزیر اعظم نوازشریف امریکی صدر باراک اوباما سے باضابطہ ملاقات کریں گے۔

واضح رہے کہ گزشتہ روز امریکی میڈیا کی رپورٹس میں دعویٰ کیا گیا ہے کہ نواز شریف کے دورے کے دوران امریکا، بھارت کی طرح پاکستان کو بھی جوہری معاہدے کی پیشکش کرسکتا ہے جس کے بعد پاکستان کے لیے بھی نیوکلیئر سپلائرز گروپ میں شامل ہونے کی راہ ہموار ہوجائے گی۔

ایک سوال کے جواب میں جوش ارنسٹ کا کہنا تھا کہ پاکستانی حکومت اپنے جوہری اثاثوں کو درپیش خطرات سے بخوبی واقف ہےاور پاکستان کی سکیورٹی فورسز پروفیشنل ہیں جو جوہری تنصیبات کی سلامتی کی اہمیت کو بخوبی سمجھتی ہیں۔

Print Friendly, PDF & Email

Comments

comments

یہ بھی پڑھیں