جنیوا: عالمی ادارہ صحت نے کرونا وائرس کے بعد افریقا میں خوف پھیلانے والے موذی مرض سے متعلق عائد ہنگامی حالت کو ختم کرنے کا اعلان کردیا ہے۔
غیر ملکی میڈیا رپورٹ کے مطابق یہ اعلان ورلڈ ہیلتھ آرگنائزیشن (ڈبلیو ایچ او) کے ڈائریکٹر جنرل ڈاکٹر ٹیڈروس نے منکی پاکس سے متعلق ہنگامی اجلاس کے بعد میڈیا سے گفتگو میں کیا۔
انہوں نے بتایا کہ منکی پاکس کے متعلق ادارہ کی جانب سے لگائی گئی ایک سالہ ایمرجنسی کو ختم کیا جارہا ہے، یہ ایک وائرل بیماری ہے جس کی وجہ سے سو سے زیادہ ممالک میں اس کے تصدیق شدہ کیسز سامنے آئے۔
یہ بھی پڑھیں: عالمی ادارہ صحت کا کورونا وائرس سے متعلق اہم اعلان
عالمی ادارہ صحت کی تازہ ترین رپورٹ کے مطابق دو ہزار بائیس کے آغاز سے رواں سال آٹھ مئی تک عالمی سطح پر 87,000 سے زیادہ منکی پاکس کے کیسز کی تصدیق ہوئی ہے۔
ڈبلیو ایچ او کے سربراہ نے کہا کہ پچھلے تین ماہ کے دوران منکی پاکس کے کیسز میں 90 فیصد کمی آئی، یہ اقدام اس جانب اشارہ کرتا ہے کہ منکی پاکس کے باعث پیدا شدہ بحران اب قابو میں آگیا ہے۔
انہوں نے مزید کہا کہ دنیا میں تباہی پھیلانے والی دونوں وبا ( کرونا اور منکی پاکس) کی ہنگامی صورت حال فی الحال ختم ہوچکی تاہم دونوں کے دوبارہ پیدا ہونے کا خطرہ موجود ہے کیونکہ دونوں وائرس گردش میں ہیں اور اپنا شکار بھی جاری رکھے ہوئے ہیں۔
انہوں نے عالمی ادارہ صحت کا مقصد واضح کرتے ہوئے کہا کہ ڈبلیو ایچ او ٹیگ کا مقصد ایک مربوط بین الاقوامی ردعمل کو متحرک کرنا اور ویکسین اور علاج کے اشتراک کے لیے تعاون کے لئے فنڈنگ فراہم کرنا ہے۔
واضح رہے کہ دو روز قبل عالمی ادارہ صحت نے تقریباً ساڑھے تین سال بعد عالمی وبا کورونا کی گلوبل ہیلتھ ایمرجنسی کے خاتمے کا اعلان کیا تھا۔
یاد رہے کہ کورونا وائرس کا آغاز دسمبر 2019 کے اختتام پر چین سے ہوا تھا اور جنوری 2020 تک یہ وائرس دیگر ممالک تک پھیل گیا تھا، جس کے بعد عالمی ادارہ صحت نے اسے عالمی وبا قرار دیا تھا۔
کورونا کی وجہ سے گزشتہ ساڑھے تین سال میں دنیا بھر میں 29 اپریل تک 7 کروڑ 65 لاکھ 22 ہزار سے زائد افراد متاثر ہوتے جب کہ اس سے 69 لاکھ 21 ہزار سے زائد اموات ہوئیں۔
