اسلام آباد: عالمی ادارہ صحت ڈبلیو ایچ او کے ریجنل ڈائریکٹر احمد المندھاری نے وزیر صحت عبد القادر پٹیل سے ٹیلی فونک گفتگو کرتے ہوئے کہا کہ سیلاب متاثرین کی بھرپور سپورٹ جاری رکھیں گے۔
تفصیلات کے مطابق عالمی ادارہ صحت ڈبلیو ایچ او کے ریجنل ڈائریکٹر احمد المندھاری نے وزیر صحت عبد القادر پٹیل سے ٹیلی فون پر رابطہ کیا، ریجنل ڈائریکٹر کا کہنا تھا کہ پاکستان میں سیلاب سے جانی و مالی نقصان کا بے حد افسوس ہے۔
وزیر صحت عبدالقادر پٹیل کا کہنا تھا کہ سیلاب متاثرین کی امداد کے لیے عالمی ادارہ صحت کا شکریہ ادا کرتا ہوں، صحت کے شعبے میں عالمی ادارہ صحت کا کلیدی کردار ہے۔
وزیر صحت نے ریجنل ڈائریکٹر کو پاکستان میں سیلاب سے ہونے والے نقصانات سے آگاہ کیا، انہوں نے بتایا کہ پاکستان میں سیلاب کے نتیجے میں بڑے پیمانے پر تباہی ہوئی ہے۔
انہوں نے بتایا کہ سندھ، بلوچستان اور خیبر پختونخواہ میں سیلاب سے صحت کے بنیادی نظام کو شدید نقصان پہنچا ہے۔
عالمی ادارہ صحت کے ریجنل ڈائریکٹر کا کہنا تھا کہ سیلاب متاثرین کی بھرپور سپورٹ جاری رکھیں گے۔
