میڈرڈ: اسپین کی حکومت نے بڑھتی مہنگائی کے دوران شہریوں کی مدد کے لیے 200 یورو کے بونس کا اعلان کیا ہے، جس کے لیے درخواستوں کی وصولی شروع ہو گئی ہے۔
غیر ملکی میڈیا رپورٹس کے مطابق حکومتِ اسپین کی جانب سے کم آمدنی والے خاندانوں کی مدد کے لیے دو سو یورو بونس اسکیم کے لیے وزارت خزانہ کو پہلے ہی دن تقریباً 5 لاکھ 70 ہزارا درخواستیں موصول ہوئیں۔
وزیر خزانہ ماریا جیس مونٹیرو نے ہسپانوی ٹی وی کو ایک انٹرویو میں کہا کہ اس بونس سے لوگوں کو معاشی صورت حال سے نمٹنے میں مدد ملے گی۔
ہسپانوی حکومت نے دسمبر میں اعلان کیا تھا کہ وہ مہنگائی کے اثرات کم کرنے کے لیے 10 ارب یورو کا ریلیف پیکج دے گی، اب اس ریلیف پیکج پر عمل شروع کر دیا گیا ہے، اس میں سب سے اہم 200 یورو کا بونس ہے، اس بونس کے لیے درخواستوں کی وصولی 15 فروری سے شروع کی گئی ہے، اور اسپین میں قانونی طور پر رہنے والے 31 مارچ تک اس بونس کے لیے درخواست دے سکتے ہیں۔
کون اہل ہوگا؟
200 یورو کا یہ بونس ان لوگوں کے لیے ہے جن کی سالانہ آمدن 27 ہزار یورو سے کم ہے، اگر دونوں میاں بیوی کام کرتے ہیں، تو ان دونوں کی تنخواہ ملا کر شمار کی جائے گی، اکیلے رہنے والے بھی اہل ہوں گے۔
پنشنرز کو یہ بونس نہیں ملے گا، ایسے افراد جن کے بینک اکاؤنٹ میں 75 ہزار یورو سے زائد رقم ہے، وہ بھی یہ بونس نہیں لے سکیں گے، اسی طرح اتنی قیمت والی گاڑی کے مالکان بھی بونس کے لیے اہل نہیں ہوں گے۔
درخواست دینے کا طریقہ کار
بونس کے لیے 15 فروری سے 31 مارچ کے دوران درخواست دینا لازمی ہے، اس کے بعد کوئی درخواست قبول نہیں کی جائے گی۔
پہلے ڈیجیٹل سرٹیفکیٹ یعنی الیکٹرانک آئی ڈی کے لیے اپلائی کرنا ہوگا، اس کے بعد اسپین کی ٹیکس اتھارٹی کی ویب سائٹ پر جا کر بونس کے لیے آن لائن درخواست دینی ہوگی۔
آن لائن فارم بھرنے کے دوران ڈیجیٹل سرٹیفکیٹ سمیت دیگر معلومات دینی ہوں گی، جن میں نام، ٹیکس نمبر، پتا، ملازمت اور بینک اکاؤنٹ کی تفصیل شامل ہے، فارم بھرنے کے بعد آپ کا کام ختم ہو جائے گا، اور حکومت آپ کے دیے گئے اکاؤنٹ میں براہ راست 200 یورو کا بونس منتقل کردے گی۔
اس بونس سے 43 لاکھ خاندانوں اور افراد کو فائدہ ہوگا۔
