ریاض : شاہ سلمان نے مکہ مکرمہ کے نائب گورنر شہزادہ عبداللہ بن عبدالعزیز کو ریاست کی اہم ترین وزارت نیشنل گارڈز کا وزیر مقرر کردیا۔
تفصیلات کے مطابق سعودی فرمانروا سلمان بن عبدالعزیز کی زیر صدارت اجلاس میں سعودی کابینہ کی ازسر نو تشکیل عمل میں لائی گئی ہے، دو روز قبل ہونے والے اجلاس میں کئی وزراء کو نئی ذمہ داریاں سونپی گئیں ہیں۔
عرب میڈیا کے مطابق شاہ سلمان کی جانب سے سعودی عرب کے نیشنل گارڈز کا قلمدان سعودی شہزادے عبداللہ بن بندر بن عبدالعزیز کو سونپا گیا ہے۔
شہزادہ عبداللہ بن بندر بن عبدالعزیز وزیر نیشنل گارڈ سے قبل بیک وقت مکہ مکرمہ کے ڈپٹی گورنر اور شاہ سلمان یوتھ سینٹر کے چیئرمین تھے۔
عرب میڈیا کا کہنا ہے کہ شہزادہ عبداللہ بن عبدالعزیز نے دو برس تک نائب گورنر کی حیثیت سے حج امور کی برائے راست نگرانی کرتے رہے ہیں۔
عرب میڈیا کا کہنا ہے کہ نوجوان شہزادے کو اہم تقریبات میں کئی مرتبہ ولی عہد محمد بن سلمان کے ہمراہ دیکھا گیا ہے اور سعودی حکومت نوجوان شہزادے کی کارکردگی سے مطمئن ہے جس کے باعث انہیں نیشنل گارڈز کی اہم ترین وزارت کا قلم دان سونپا گیا ہے۔
واضح رہے کہ وزارت نیشنل گارڈز انتہائی اہم ہے جس کا کام سعودی عرب کی سیکیورٹی کو یقینی بنانا ہے۔
عرب خبر رساں ادارے کا کہنا ہے کہ ایک ماہ تک جاری رہنے والے الجنادریہ ثقافتی میلے کی سیکیورٹی ذمہ داری بھی نیشنل گارڈز کے ذمہ ہوتی ہے، الجنادریہ ثقافتی میلے کا انعقاد سعودی حکومت کی جانب سے کیا جاتا ہے جو ریاست کا اہم ترین ثقافتی میلہ ہوتا ہے۔
مزید پڑھیں : سعودی عرب، وزارتی کونسل میں ردوبدل، وزیر خارجہ تبدیل
عرب میڈیا کے مطابق وزارت خارجہ، اطلاعات اور تعلیم، انٹرٹینمنٹ، اسپورٹس اور اسپیس اتھارٹی کے سربراہ سمیت کئی سربراہوں کو تبدیل کیا گیا ہے۔
