قاہرہ: مصر میں شوہر کی جان بچانے کے لیے بیوی نے بڑی قربانی دے دی، اپنے جگر کا ایک ٹکڑا عطیہ کر دیا۔
العربیہ چینل کے مطابق مصر کے دارالحکومت قاہرہ کی شمال مشرقی کمشنری میں مقیم 43 سالہ ھبہ عطیہ ابراہیم نے کافی عرصے سے ہیپٹائٹس کے مرض میں مبتلا شوہر کو اپنے جگر کا ٹکڑا دے کر ان کی جان بچا لی۔
ڈاکٹروں کا کہنا تھا کہ آپریشن کامیاب رہا ہے اور اب دونوں تیزی سے رو بہ صحت ہیں۔
ھبہ عطیہ ابراہیم نے انٹرویو میں بتایا کہ انھیں 17 برس قبل منگنی کے محض ایک ماہ بعد معلوم ہوا کہ ان کے ہونے والے شوہر کو ہیپٹائٹس کا مرض لاحق ہو گیا ہے، اب مرض آخری سٹیج پر پہنچ چکا تھا، لیکن کہیں سے پیوندکاری کے لیے جگرکا عطیہ نہیں مل رہا تھا۔
انھوں نے بتایا کہ ہرسمت سے مایوس ہونے کے بعد انھوں نے اپنے جگر کا ٹکڑا عطیہ کرنے کا فیصلہ کیا، تاہم اس تجویز پر شوہر نے یہ کہہ کر انکار کیا کہ اگر کچھ ہوا تو بچوں کا کیا ہوگا، لیکن اہلیہ کے اصرار پر وہ بھی مان گئے۔
مصری خاتون کے مطابق جب ان کی منگنی کے بعد ہیپاٹائٹس کا انکشاف ہوا تو والدین نے تسلی دی کہ یہ قسمت کا کھیل ہے، موت ایک صحت مند انسان کو بھی کسی بھی وقت آ سکتی ہے، اور بیمار صحت مند ہو سکتا ہے۔
ھبہ عطیہ ابراہیم نے بتایا کہ شادی کے بعد ان کی زندگی خوش گوار گزری، تین بچے بھی ہوئے، والدین کے مرنے کے بعد شوہر نے بہت خیال رکھا، لیکن کچھ عرصہ قبل شوہر کا مرض بہت بڑھ گیا تو ڈاکٹروں نے جگر کی پیوند کاری تجویز کی۔
مصری خاتون نے بتایا کہ سب واقف کاروں سے رجوع کیا گیا مگر کسی نے جگر کا چوتھائی ٹکرا دینے کی حامی نہیں بھری، جس پر انھوں نے اپنے جگر کا ٹکڑا دینے کا فیصلہ کر لیا۔
