اسلام آباد : ملک کے پانچ شہروں کے 9 سیوریج سیمپلز میں وائلڈ پولیو وائرس ون کی تصدیق ہوگئی۔
تفصیلات کے مطابق حکومتی نااہلی سے ملک بھر کی ملکی سیوریج پولیو سے آلودہ ہو گئیں، پولیو پازیٹو سیوریج سیمپلز کی ٹیکنیکل رپورٹ تیارکر لی گئی ہے، جس مین پانچ شہروں کے نو سیوریج سیمپلز میں وائلڈ پولیو وائرس ون کی تصدیق ہوئی۔
این آئی ایچ نے پولیو پازیٹو سیوریج کی رپورٹ وزارت صحت کو بھجوا دی، ذرائع نے بتایا کہ کراچی، پشاور، کوئٹہ، چمن اور مستونگ کی سیوریج پولیو پازیٹو ہے، جس کے بعد رواں برس کے پولیو پازیٹو سیوریج سیمپلزکی تعداد 65 تک پہنچ گئی ہے۔
ذرائع کا کہنا تھا کہ پولیوٹیسٹ کیلئے سیمپلنگ اکیس تا ستائیس فروری ہوئی تھی، کراچی ساؤتھ اور کورنگی کی سیوریج میں پولیو وائرس پایا گیا، منظورکالونی اور کورنگی نالہ کی سیوریج پولیو زدہ ہے۔
ذرائع نے کہا کہ رواں برس کراچی ساؤتھ میں سیوریج چوتھی بار اورکورنگی نالہ کی سیوریج دوسری بار پولیو پازیٹو ہوئی، دونوں علاقوں میں پولیووائرس جینیاتی طور پر لوکل ہے۔
ذرائع کے مطابق پشاور کے علاقے شاہین مسلم ٹاؤن کی سیوریج پولیو پازیٹو ہے، رواں برس یہاں کے سات سیوریج سیمپلز پولیو پازیٹو ہوچکے ہیں، پشاور میں پولیووائرس جینیاتی طور پر لوکل ہے۔
رہورٹ میں بتایا گیا کہ کوئٹہ کے علاقوں سرپل اور طاوس آباد کی سیوریج پولیو پازیٹو ہے، رواں برس کوئٹہ کی سیوریج میں آٹھ بار پولیو وائرس پایاگیا۔
پولیو وائرس کا جینیاتی تعلق چمن سے ہے، چمن میں کے ہادی پاکٹ اورکازیبہ سائٹ کی سیوریج بھی پولیو پازیٹو ہے، رواں برس چمن کی سیوریج میں چوتھی بار پولیو وائرس پایاگیا، یہاں کا پولیووائرس جینیاتی طور پر لوکل ہے۔
اس کے علاوہ مستونگ عدالت روڈ کی سیوریج میں پولیووائرس پایا گیا، رواں سال مستونگ کی سیوریج پہلی بارپولیو پازیٹو ہوئی، یہاں کےپولیووائرس کا جینیاتی تعلق چمن سےہے، رواں برس ملک میں پولیو وائرس کےدوکیسز رپورٹ ہوچکےہیں۔
