کوئٹہ گلیڈیئٹرز کے کپتان سرفراز احمد کے ہاتھ کی انگلی میں چوٹ لگنے کے باعث ان کی پی ایس ایل کے اگلے میچز میں شرکت مشکوک ہوگئی ہے۔
ایچ بی ایل پاکستان سپر لیگ سیزن 8 کے سنسنی خیز میچوں پر مشتمل پہلا مرحلہ اختتام کی جانب گامزن ہے۔ گزشتہ روز کوئٹہ گلیڈیئٹرز نے اہم میچ میں کراچی کنگز کو شکست دے کر ایونٹ میں اپنی موجودگی کے امکانات کو برقرار رکھا۔
اے آر وائی نیوز کی براہ راست نشریات دیکھنے کے لیے کلک کریں:
اس اہم میچ میں کوئٹہ گلیڈیئٹرز کے کپتان سرفراز احمد نے ہاتھ کی انگلی میں پٹی باندھ کر بیٹنگ کی اور مشکل وقت میں ٹیم کے لیے قیمتی اننگ کھیلی۔
ٹیم منیجر اعظم خان کا کہنا ہے کہ سرفراز احمد نے ٹیم کی ضرورت کیلیے تکلیف کے باوجود بیٹنگ کی۔ انہوں نے نے انگلی پر پٹیاں باندھ کر ٹیم کیلیے بیٹنگ کی۔
ٹیم انتظامیہ کا کہنا ہے کہ گلیڈی ایٹرز کے کپتان کی انگلی کا ایکسرے آج رات کیا جائے گا۔ اسکین کی رپورٹ کے بعد ہی سرفراز احمد کے اگلے میچز میں شرکت کرنے یا نہ کرنے کا فیصلہ کیا جائے گا۔
دوسری جانب میچ کے بعد گفتگو کرتے ہوئے کوئٹہ کے کپتان سرفراز نے کہا کہ انگلی کی حالات ٹھیک نہیں لگ رہی ہے۔ ایکسرے کے بعد ہی صورتحال واضح ہوسکے گی۔
ان کا کہنا تھا کہ کرکٹ میں کبھی بھی کچھ بھی ہو سکتا ہے، اس میچ میں بھی بہت غلطیاں کیں، اس کو دیکھنا پڑے گا کیونکہ ہمیں اپنے بقیہ میچز جیتنےہیں۔
