واشنگٹن : مائیکروسافٹ کمپنی نے آئندہ سال کے آغاز سے مشہور آپریٹنگ سسٹم ’ونڈوز 7‘ کی ٹیکنیکل سپورٹ اور سسٹم اپڈیٹس کا سلسلہ بند کرنے کا اعلان کردیا۔
تفصیلات کے مطابق مشہور سافٹ ویئر کمپنی مائیکرو سافٹ نے اپنے بہترین آپریٹنگ سسٹم ونڈوز سیون کی اپڈیٹشن 2020 میں بند کرنے کا اعلان کرتے ہوئے بتایا ہے کہ اگر کوئی ونڈوز 7 کا تجارتی و کاروباری صارف ہے تو اسے اضافی فیس پر ونڈوز7 کی سیکیورٹی اپڈیٹ فراہم کی جائے گی۔
غیر ملکی خبر رساں ادارے کی رپورٹ کے مطابق قانونی طور پر ونڈوز 7 استعمال کرنے والے افراد اگلے سال 14 جنوری کے بعد ونڈوز کی جانب سے اپ ڈیٹس موصول نہیں کرپائیں گے۔
واضح رہے کہ آن لائن سیکیورٹی کے حوالے سے دن بدن نت نئے خطرات سامنے آتے رہتے ہیں جن کا سامنا کرنے کے لیے باقاعدگی سے ”ونڈوز سیکیورٹی اپ ڈیٹس“ بالعموم ہفت روزہ بنیادوں پر پیش کی جاتی ہیں۔
ونڈوز آپریٹنگ سسٹم ان اپ ڈیٹس کو ڈاؤن لوڈ کرکے خود بخود انسٹال کرلیتا ہے، اگرچہ اپ ڈیٹس نہ ملنے کی صورت میں آپریٹنگ سسٹم پر کوئی فرق نہیں پڑے گا لیکن اس کی سیکیورٹی کو خطرات ضرور لاحق ہوسکتے ہیں۔
یہ بھی بتاتے چلیں کہ ”ونڈوز ایکس پی“ مائیکرو سافٹ کا سب سے کامیاب آپریٹنگ سسٹم رہا، جو اگست 2001ء میں لانچ کیا گیا اور اس کی سپورٹ 8 اپریل 2014ءکو ختم کی گئی۔
ونڈوز7 کے بعد 22 جولائی 2009ء کو ونڈوز 7 آپریٹنگ سسٹم لانچ کیا گیا، اگرچہ یہ بھی بہت کامیاب رہا لیکن اس کی کامیابی کی شرح ونڈوز ایکس پی کے مقابلے میں کم تھی۔
