جوہانسبرگ: پی ایس ایل سیزن 6 کے بقیہ میچوں میں اسلام آباد یونائیٹڈ کی نمائندگی کے لیے تیار جنوبی افریقی کرکٹر جانیمن ملان کا کہنا ہے کہ وہ اردو میں جانِ من کا مطلب جانتے ہیں اور پاکستانیوں کا ’جانِ من‘ بننے کے منتظر ہیں۔
جنوبی افریقی کرکٹر جانیمن ملان نے سوشل میڈیا پر اپنے پیغام میں کہا کہ اسلام آباد یونائیٹڈ میں شامل ہونے کے لیے پرجوش ہوں، اس فرنچائز کے بارے میں بہت سی زبردست باتیں سن رکھی ہیں۔
ملان نے کہا کہ ’مجھے ابھی معلوم ہوا کہ جانِ من کے اردو میں کیا معنی ہیں، لہٰذا میں کوشش کروں گا کہ اپنی کارکردگی سے پاکستانیوں کا جانِ من بن سکوں۔
Excited to join @IsbUnited Heard so many great things about the franchise. I just found out what Janneman means in urdu. I wish to be janneman to all Pakistanis with my performances in the PSL. #UnitedWeWin
— Janneman Malan (@Janneman_Malan) April 28, 2021
انہوں نے اپنے ٹویٹ میں ہیش ٹیگ ’یونائیٹڈ وی وِن‘ کا بھی استعمال کیا۔
واضح رہے کہ کھلاڑیوں اور آفیشلز میں کورونا کے کیسز بڑھنے کے بعد پی سی بی نے ایونٹ کو ملتوی کردیا تھا۔
پی ایس ایل کے باقی میچز یکم سے 20 جون تک کراچی میں کھیلے جائیں گے، ایک ہفتے کا قرنطینہ 22 مئی سے شروع ہو گا۔
