برمنگھم: برطانیہ کے شہر برمنگھم میں پالتو کتے نے مالکن کو مار ڈالا۔
غیرملکی خبررساں ادارے کی رپورٹ کے مطابق برمنگھم میں 25 سالہ مالکن کیرا لاڈلو گھر پر آرام کررہی تھیں کہ کتے نے اچانک ان پر حملہ کردیا جس کے نتیجے میں وہ ہلاک ہوگئیں۔
پولیس کے مطابق خاتون پر کتے کا حملہ انتہائی درد ناک تھا اور ان کے جسم پر کتے کے کاٹنے کے نشانات تھے، کتے کو پولیس نے قبضے میں لے لیا، واقعے کے وقت گھر میں کوئی اور شخص موجود نہیں تھا۔
خاتون کی رشتے داروں کے مطابق کیرالاڈلو کا پرانا کتا کینسر کی وجہ سے مر گیا تھا جس کے بعد وہ قریبی پارک میں موجود اس کتے کو اپنے گھر لے آئی تھیں۔
رپورٹ کے مطابق جب کتے نے خاتون پر حملہ کیا تو خاتون مدد کے لیے چلائی تھیں اور اس وقت کتے کی بھی آواز بہت تیز تھی۔
خاتون کے پڑوسیوں نے شور کی آواز سن کر پولیس کو اطلاع دی لیکن پولیس کے پہنچنے سے قبل ہی کتا خاتون کو بری طرح سے زخمی کرکے مار چکا تھا۔
پڑوسیوں کا کہنا ہے کہ یہ انتہائی ہولناک واقعہ ہے اور ہمیں یقین نہیں آرہا کہ کسی کا پالتو کتا اس طرح حملہ کرسکتا ہے۔
پولیس کا کہنا ہے کہ خاتون کی ہلاکت کتے کے حملے کی وجہ سے ہی ہوئی ہے لیکن ہر زاویے کے کیس کی تحقیقات کی جارہی ہیں۔
