کوئٹہ: بلوچستان کی حکومت نے میراثی جائیداد میں خواتین کے شرعی حصے کی ایک ماہ کے اندر منتقلی کو یقینی بنانے کے لیے لینڈ ریونیو ایکٹ میں ترمیم کی منظوری دے دی ہے۔
برطانوی نشریاتی ادارے کے مطابق یہ فیصلہ گزشتہ روز بلوچستان کابینہ کے اجلاس میں کیا گیا، اجلاس کی صدارت وزیر اعلیٰ بلوچستان جام کمال خان کررہے تھے ، اس کے ساتھ ہی دیگر کئی منصوبوں کی منظوری بھی دی گئی۔
اس کے ساتھ ساتھ کابینہ کے اجلاس کے متعلق جاری ہونے والے ایک اعلامیے میں کہا گیا ہے کہ کابینہ نے بلوچستان لینڈ ریونیو ترمیمی ایکٹ سنہ 2018 میں چار نئی ترامیم کی منظوری دی۔
ان ترامیم کا مقصد وراثتی جائیداد میں خواتین کے شرعی حصے کی 30 دن کے اندر منتقلی کو یقینی بنانا ہے۔ ان ترامیم کا اطلاق زیر التوا مقدمات پر بھی ہو گا۔ان ترامیم کے تحت ریونیو آفیسر قانونی معاملات کو چھ ماہ کے اندر نمٹانے اور فیصلہ کرنے کا پابند ہو گا۔
کابینہ کی جانب سے جاری کردہ اعلامیے کے مطابق قانونی وراثت کے تصدیقی عمل کو نادرا کے ریکارڈ سے منسلک کیا جائے گا۔کابینہ نے لینڈ ریکارڈ کی ڈیجیٹلائزیشن کے لیے لینڈ ریکارڈ مینجمنٹ سسٹم کے قیام کی منظوری بھی دی۔
علاوہ ازیں اعلامیے کے مطابق کابینہ نے محکمہ پبلک ہیلتھ انجنیئرنگ اور کمیونٹی کے تحت بجلی اور ڈیزل پر چلنے والی پینے کے پانی کی فراہمی کے سکیموں کو شمسی توانائی پر منتقل کرنے کی بھی منظوری دی۔
اس منصوبے کے لیے چار ارب روپے مختص کرتے ہوئے محکمہ پبلک ہیلتھ انجینئرنگ کو اسے حتمی شکل دینے کی ہدایت کی گئی ہے۔ اس منصوبے کا مقصد واٹر سپلائی سکیموں پر بجلی اور ڈیزل کی مد میں ہونے والے اخراجات کی بچت کے ساتھ ساتھ واٹر سپلائی اکیموں کو مستقل طور فعال رکھنا ہے۔
دریں اثنا کابینہ نے بلوچستان سیف سٹی اتھارٹی بل سنہ 2018 کی منظوری بھی دی جس کے تحت وزیر اعلیٰ بلوچستان اتھارٹی کے چیئر مین اور وزیر داخلہ وائس چیئر مین ہوں گے۔
