اسلام آباد: ہانگ کانگ کی کھلاڑی ’اینی او‘ نے چیف آف دی ایئر اسٹاف انٹرنیشنل وویمن اسکواش چیمپئن شپ جیت کر اعزاز اپنے نام کرلیا۔
تفصیلات کے مطابق وفاقی دارالحکومت کے مصحف اسپورٹس کمپلیکس میں وویمنز اسکواش چمپئن شپ کا فائنل کھیلا گیا جس میں ہانگ کانگ کی کھلاڑی نے فتح اپنے نام کی۔
25 ہزار ڈالر انعامی رقم کی حامل چیف آف دی ائیر اسٹاف انٹر نیشنل وویمن اسکواش چیمپئن شپ کے فائنل ہانگ کانگ کی کھلاڑی اینی او نے ملائیشین کھلاڑی سیواسنگاری سبرا مینیئم کو یک طرفہ مقابلے میں شکست دے کر ٹائٹل اپنے نام کیا۔
مزید پڑھیں: اسکواش مینزچیمپین شپ: کوئی پاکستانی کھلاڑی کوالیفائی نہ کرسکا
اینی اوو گیم کے ابتداء سے ہی اپنی حریف پرحاوی نظر آئیں اور انہوں نے پہلے گیم میں 5/11 جبکہ دوسرے گیم میں 7/11 اور تیسرے میں 1/11 سے کامیابی اپنے نام کی۔
اس موقع پر پاک فضائیہ کے سربراہ ایئرچیف مارشل سہیل امان مہمانِ خصوصی تھے جنہوں نے کھلاڑیوں میں انعامات تقسیم کیے جبکہ فائنل میچ دیکھنے کےلیے غیر ملکی سفیر، سابق ورلڈ چیمپئن جہانگیر خان، قمر زمان کے علاوہ اسکواش کے شائقین نے میچ دیکھا۔
یہ بھی پڑھیں: پاکستان میں 19سال بعد اسکواش کے عالمی ٹورنامنٹس کا اعلان
واضح رہے کہ اسکواش فیڈریشن نے 6 دسمبر کو پاکستان میں مرد اور خواتین کے انٹرنیشنل ٹورنامنٹس کے انعقاد کا اعلان کیا تھا، چیمپئن شپ 17 سے 24 دسمبر تک وفاقی دارالحکومت میں کھیلی گئی۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر ضرور شیئر کریں۔
