دبئی: متحدہ عرب امارات میں 4 سالہ بچے کے اغوا کی کوشش ناکام بنادی گئی، بھارتی شہری کو گرفتار کرلیا گیا۔
عرب میڈیا کے مطابق دبئی میں 4 سالہ بچے کے اغوا کی کوشش ناکام بنادی گئی، بھارتی شہری کو گرفتار کرلیا گیا، عدالت میں ملزم نے اپنے خلاف عائد الزامات کو مسترد کردیا۔
عدالت میں سماعت کے دوران استغاثہ نے بتایا کہ چار سالہ عرب بچہ اپنی رہائشی بلڈنگ میں بنے پارک میں کھیل رہا تھا اس کی آنٹی بھی پارک میں موجود تھیں، آنٹی کی نظریں بچے سے ہٹیں تو وہاں موجود 32 سالہ بھارتی شہری اسے اپنے ساتھ لے کر چل دیا۔
استغاثہ کے مطابق بچے نے جونہی خود کو کسی اجنبی کے پاس محسوس کیا تو رونے لگا جس پر ملزم نے اس کی آواز بند کرنے کے لیے اس کا منہ اپنے سینے میں دبا لیا۔
مزید پڑھیں: خاتون کے اغواء اور جنسی زیادتی میں ملوث عرب شہری گرفتار
بچے کی آنٹی نے جب ملزم کو تیز تیز قدموں سے بچے کو لے جاتا ہوئے دیکھا تو اس کا پیچھا کیا اور اس کے پاس پہنچ کر شور مچایا تو وہ بچے کو چھوڑ کر فرار ہوگیا۔
رپورٹ کے مطابق خاتون نے ملزم کی اپنے موبائل فون سے تصویر کھینچ لی تھی جس کی مدد سے پولیس نے اسے گرفتار کیا۔
ملزم نے اپنے خلاف عائد الزامات کو مسترد کریا ہے، یہ واقعہ 21 فروری 2019 کو پیش آیا تھا جس کی رپورٹ البشرا پولیس اسٹیشن میں درج کرائی گئی تھی۔
عدالت کی جانب سے اس مقدمے کا فیصلہ 21 مئی 2019 کو سنایا جائے گا۔
