کراچی: پاکستان کے چار کھلاڑیوں نے آئی بی ایس ایف سکس ریڈ اسنوکر چیمپئن شپ کے کوارٹرفائنل کیلئے کوالیفائی کرلیا، کوارٹر فائنل میں سابق ورلڈ چیمپئین محمد آصف اور شیرام چنگیزی آمنے سامنے ہوں گے۔
کراچی میں جاری ایونٹ میں پاکستان کے محمد آصف نے ہم وطن محمد شہاب کو تین کے مقابلے میں پانچ فریم سے شکست دے کر کوارٹر فائنل میں جگہ بنالی جہاں ان کا مقابلہ ہم وطن شہرام چنگیزی سے ہوگا۔
شہرام چنگیزی نے پری کوارٹر فائنل میں شاہد آفتاب کو پانچ تین سے زیر کیا تھا،دیگر مقابلوں میں دفاعی چیمپئین بھارت کے پنکج ایڈوانی نے پاکستان کے بابر مسیح کو یک طرفہ مقابلے کے بعد شکست دی۔
قومی کھلاڑی صرف ایک سیٹ میں ہی کامیابی حاصل کرسکے۔ پاکستان کے اسجد اقبال نے بھارت کے وارن کمار کو زیر کیا، اسجد نے تین کے مقابلے میں پانچ فریم سے کامیابی حاصل کی۔
