ورلڈ باڈی بلڈنگ چیمپئن شپ میں پاکستان نے 3 برونز میڈلز جیت لیے۔
سعودی عرب کے شہر الخبر میں منعقدہ ورلڈ فٹنس چیلنج اینڈ باڈی بلڈنگ چیمپئن شپ میں پاکستانی ایتھلیٹس نے شان دار کارکردگی دکھاتے ہوئے پاکستان کے لیے تین برونز میڈلز جیت لیے۔
ورلڈ فٹنس چیمپئن شپ کے مینز مقابلوں میں 57 ممالک جب کہ ویمنز مقابلوں میں 18 ممالک کے ایتھلیٹس نے حصہ لیا۔ پاکستان آرمی سے تعلق رکھنے والے تینوں کھلاڑیوں نے مختلف کیٹیگریز میں نمایاں پرفارمنس دکھاتے ہوئے میڈلز اپنے نام کیے۔
پاکستان آرمی کی اولمپئن صدف صدیقی نے ویمنز ماسٹرز کیٹیگری میں بھرپور مہارت اور شان دار کارکردگی کا مظاہرہ کرتے ہوئے کانسی کا تمغہ جیتا۔ حوالدار مقبول احمد نے انفرادی ماسٹرز کیٹیگری میں زبردست مقابلے کے بعد برونز جب کہ انعام اللہ نے سینئرز کیٹیگری میں کانسی کا میڈل اپنے نام کیا۔
