بھارت میں منعقدہ کرکٹ ورلڈکپ کئی ناپسندیدہ وجوہات کی بنا پر شہ سرخیوں میں ہے جن میں سے ایک وجہ شائقین کرکٹ کا کم تعداد میں گراؤنڈ کا رُخ کرنا بھی ہے۔
میزبان بھارت اور افغانستان کے درمیان میچ کے دوران بھی اسٹیڈیم کی کئی نشتیں خالی تھیں، سابق انگلش کپتان مائیکل وان نے عالمی کپ کے دوران بھارت کے میچ می بھی اسٹیڈیم کو خالی دیکھ کر ایک طنزیہ ٹوئٹ کرڈالی جس پر ہربھجن آگ بگولہ ہوگئے۔
بلیو شرٹس نے افغانستان کو دہلی کے ارون جیٹلی کرکٹ اسٹیڈیم میں کھیلے گئے میچ میں 8 وکٹوں سے شکست دی تھی۔ تاہم میچ کے دوران انگلش کمنٹیٹر مائیکل وان نے ٹوئٹ کیا کہ آج تو بھارت کا میچ ہے اس کے باوجود اتنی خالی سیٹیں کیوں ہیں۔
سابق آف اسپنر ہربھجن سنگھ کو یہ ٹوئٹ بہت ناگوار گزری اور انھوں نے جواب دیتے ہوئے کہا کہ آپ کھیل دیکھ رہے ہیں یا خالی نشستیں؟
تاہم سابق بھارتی کرکٹر کا یہ انداز کرکٹ شائقین کو کچھ خاص پسند نہیں آیا اور انھوں نے اس پر ہربھجن سنگھ کو ہی تنقید کا نشانہ بناڈالا۔
واضح رہے کہ بھارت میں منعقد ہونے والے عالمی کپ کے افتتاحی میچ میں محض چند شائقین میں موجود تھے جس پر بھارتی بورڈ کو کافی تنقید کا نشانہ بنایا گیا تھا جب کہ بی سی سی آئی نے افتتاحی تقریب بھی منسوخ کردی تھی۔
ابتدائی میچز میں شائقین سے خالی اسٹیڈیمز دیکھ کرایک اور سابق بھارتی کھلاڑی وریندر سہواگ نے ورلڈکپ منتظمین کو رائے دی کہ گراؤنڈز کو مداحوں سے بھرنے کے لیے اسکول کے بچوں کو مفت ٹکٹس دیے جائیں۔
