The news is by your side.

Advertisement

انسانیت سے محبت کا دن دنیا بھر کے طبی عملے کے نام

آج دنیا بھر میں انسانیت اور انسان دوستی کا عالمی دن منایا جارہا ہے، رواں برس اس دن کو کرونا وائرس سے برسر پیکار دنیا بھر کے طبی عملے کے نام کیا گیا ہے۔

سنہ 2003 میں 19 اگست کو عراقی دارالحکومت بغداد میں کنال ہوٹل پر خودکش بم حملہ ہوا جس میں عراق میں متعین اقوام متحدہ کے نمائندہ بھی ہلاک ہوئے، آج کا دن اسی دن کی یاد میں منایا جاتا ہے۔

سنہ 2009 سے یہ دن باقاعدہ طور پر منایا جانے لگا، اقوام متحدہ کی جنرل اسمبلی کی جانب سے منظور کردہ یہ دن ان افراد کے لیے منسوب ہے جو انسانی ہمدردی کے تحت اپنا گھر بار چھوڑ کر مجبور اور ضرورت مند افراد کی مدد کرتے ہوئے مارے گئے۔

رواں برس اس دن کو طبی عملے کے نام کیا گیا ہے جو دنیا بھر میں کرونا وائرس کو شکست دینے کے لیے انتھک کام کر رہا ہے۔

اقوام متحدہ کا کہنا ہے کہ کرونا وائرس نے دنیا بھر میں جاری فلاحی کاموں کو بے حد متاثر کیا ہے، ایسے میں مختلف ممالک کی جانب سے عائد سرحدی پابندیوں نے ان مشکلات میں اضافہ کردیا ہے۔

اقوام متحدہ کے مطابق ان مسائل کی وجہ سے متنازعہ اور جنگ زدہ علاقوں میں موجود نہ صرف عام انسان بلکہ وہاں کام کرنے والا طبی عملہ اور فلاحی کارکنان بھی سخت مشکلات کا شکار ہیں۔

Comments

یہ بھی پڑھیں