ریاض: دولت اسلامیہ کے سربراہ البغدادی کی ہلاکت پر سعودی عرب نے امریکی صدر ڈونلڈ ٹرمپ کو مبارکباد پیش کی۔
تفصیلات کے مطابق سعودی وزارت خارجہ کے ایک سرکاری ذرائع نے بتایا کہ سعودی حکومت کا کہنا ہے دہشت گرد تنظیم داعش کے سربراہ ابو بکر البغدادی کو شکست دینے کی کوششوں میں کامیابی پر امریکی صدر ڈونلڈ ٹرمپ تحسین کے مستحق ہیں۔
غیرملکی خبررساں ادارے کے مطابق سعودی حکومت نے کہا کہ البغدادی کو اس کے بدترین انجام سے دوچار کرنے کا وعدہ پورا کر دکھایا ہے، سعودی حکومت اس خطرناک دہشت گرد تنظیم کے جنگجوﺅں کا تعاقب جاری رکھنے کی امریکی انتظامیہ کی عظیم کاوشوں کو سراہتی ہے۔
ریاض حکومت کے مطابق اس گروپ نے پوری دنیا میں اسلام اور مسلمانوں کے تشخص کو نقصان پہنچایا اور اسلام کا اصل چہرہ مسخ کیا، یہ گروپ سعودی عرب سمیت متعدد ممالک میں بنیادی انسانی اقدار کے منافی مظالم اور جرائم کے ارتکاب کا مرتکب ہوا ہے۔
ذرائع نے اس بات پر زور دیا کہ سعودی حکومت دہشت گردی کا مقابلہ کرنے ، اس کے ذرائع آمدن بند کرنے اور اس کے خطرناک مجرمانہ نظریہ کا مقابلہ کرنے کے لیے اپنے اتحادیوں خصوصا امریکا کے ساتھ مل کر کوششیں جاری رکھے ہوئے ہے۔
ابوبکر البغدادی کی ہلاکت کے بعد انتقامی حملوں کا خدشہ
یاد رہے امریکی اسپیشل فورسز نے ٹرمپ کی منظوری سے ادلب میں آپریشن کیا، جس کے نتیجے میں ابوبکر البغدادی مارا گیا تھا۔
امریکی صدر ڈونلڈ ٹرمپ نے میڈیا سے گفتگو کرتے ہوئے سربراہ ابوبکر البغدادی کی موت کی تصدیق کی تھی اور کہا اس کے ساتھ کئی دہشت گرد بھی مارے گئے، آپریشن کے دوران کوئی امریکی فوجی ہلاک نہیں ہوا ہے، ابوبکر البغدادی شام میں ایک سرنگ میں موجود تھا، آپریشن کے دوران وہ خودکش دھماکے میں مارا گیا۔
