The news is by your side.

Advertisement

زندگی میں کامیابی کا انحصار سونے پر ہے!

ہماری زندگی میں پرسکون نیند اس قدر ضروری ہے کہ ماہرین کا کہنا ہے کہ ہماری زندگی کی کامیابی کا انحصار بھی اسی نیند پر ہے، اگر ہم روزانہ پرسکون، بہترین اور مناسب وقت کی نیند لیں گے، تو یہ ہماری کامیابی کی ایک اہم وجہ ثابت ہوسکتی ہے۔

نیند کی اسی اہمیت کو اجاگر کرنے کے لیے ہر سال کی طرح آج یعنی مارچ کے تیسرے جمعے کو نیند کا عالمی دن منایا جارہا ہے۔

دراصل ماہرین کا کہنا ہے کہ نیند پوری نہ ہونے سے ہماری جسمانی توانائی اور دماغی کارکردگی پر بہت برا اثر پڑتا ہے۔

نیند کی کمی سے ہم سارا دن تھکن اور سستی کا شکار رہتے ہیں، اپنے کام ٹھیک طرح سے انجام نہیں دے سکتے، اور نہ ہی نئے تخلقیی خیالات سوچ سکتے ہیں۔ تو پھر بھلا ہم زندگی میں کامیاب کیسے ہوسکتے ہیں۔

یہی نہیں نیند کی کمی آپ کو بدمزاج اور چڑچڑا بھی بنا سکتی ہے۔ طویل عرصے تک نیند کی کمی کا شکار رہنے والے افراد موٹاپے، ڈپریشن، ذیابیطس، ذہنی دباؤ اور امراض قلب کا بھی شکار ہوجاتے ہیں۔

آج کل بے خوابی کا مرض بہت عام ہوگیا ہے، ماہرین کا کہنا ہے کہ اس کی دوائیں لینے کے بجائے طرز زندگی میں تبدیلی لائی جائے، جنک فوڈ کا استعمال کم کر کے پھلوں اور سبزیوں کا استعمال بڑھا دیا جائے، فعال زندگی گزاری جائے جس کا سب سے بہترین طریقہ ورزش ہے، اور مثبت انداز فکر اپنایا جائے۔

Comments

یہ بھی پڑھیں