واشنگٹن : امریکا کی متعدد ریاستوں میں طوفان اوربارشوں نے تباہی مچادی، مواصلاتی نظام درہم برہم ہوگیا اور سیکڑوں پروازیں منسوخ ہوگئیں جبکہ چین میں شدید دھند نے معمولات زندگی متاثرکر دئیے۔
امریکا میں طوفان اور باد وباراں نے تباہی مچائی تو چین میں چھائی دھند نے لوگوں کو پریشان کیا، امریکی ریاست الاباما میں شدید بارشوں سے لوگوں کو مشکلات کا سامنا کرنا پڑا دیگر جنوبی ریاستوں میں بھی شدید طوفانی بارشوں سے سیلابی صورتحال پیدا ہوگئی ہے، ندی نالوں میں طغیانی اور دریاؤں کے بپھرنے سے سڑکیں زیرآب آگئیں۔
شمالی ریاستوں میں مزید سیلاب کی وارننگ جاری کردی گئی، طوفانی ہواؤں سے سیکڑوں صارفین کو بجلی کی فراہمی معطل ہوگئی۔
الاباماکےگورنرنے ریاست کے جنوبی علاقوں میں ایمرجنسی نافذ کردی ہے، انتظامیہ کے مطابق ٹیکساس،اوکلاہوما، لوزیانا سمیت دیگر ریاستوں میں شدید طوفان اور شدید بارشوں کا بھی امکان ہے۔
دوسری جانب ٹینیسی، آرکنساس اورمسیسپی میں طوفان کے نتیجے میں چودہ افراد ہلاک ہوگئے، بیجنگ میں چھائی دھند کے باعث لوگوں کو معمولات زندگی جاری رکھنے میں مشکلات کا سامنا ہے۔
