The news is by your side.

Advertisement

شہر قائد میں بدترین ٹریفک جام، ایمبولینسز بھی پھنس گئیں

کراچی: شہر قائد میں دفاعی نمائش کے موقع پر صبح سے ہی شہریوں کو ٹریفک جام کے مسائل کا سامنا ہے، حسن اسکوائر کے اطراف جانے والی سٹرکیں بند ہونے کے باعث کئی علاقوں میں بدترین ٹریفک جام ہے اور مختلف علاقوں میں ٹریفک کی روانی سست روی کا شکار ہے جس کے باعث منٹوں کا سفر گھنٹوں میں طے ہورہا ہے۔

نمائندہ اے آر وائی کراچی سلمان لودھی کے مطابق شہر کی صرف ایک سڑک بند ہونے سے ٹریفک پولیس کے پلان کا پول کھل گیا ہے، پولیس کی جانب سے ناقص حکمتِ عملی کے باعث شہریوں کو پریشانی کا سامنا ہے۔

سلمان لودھی نے کہا کہ سول اور جناح اسپتال کے اطراف میں شدید ٹریفک جام ہے جس میں ایمبولینسز بھی پھنسی ہوئیں ہیں۔ ٹریفک سنگلز کام کررہے جبکہ پولیس اہلکار بھی ڈیوٹیوں پر موجود ہیں تاہم دفاتر کی چھٹی ہونے کے باعث صورتحال مزید خراب ہوتی جارہی ہے۔ ٹریفک کے پھنسے لوگ جلدی جانے کے چکر میں اپنی گاڑی غلط ٹریک پر لے جاتے ہیں جو ٹریفک جام کی بڑی وجہ ہے۔


پڑھیں: ’’ آئیڈیاز 2016، متبادل ٹریفک روٹ کا اعلان ‘‘


نمائندہ اے آر وائی کامل عارف کے مطابق لوگوں کو ہدایت دی گئی تھی کہ وہ ماری پور سے شہر میں داخل ہوں لیکن وہاں بھی پولیس نے انتظامات نہیں کیے جس کے باعث ٹریفک کی روانی وہاں بھی متاثر ہے ۔

کچھ اہم شاہراہیں وی وی آئی  پی موومنٹ کے سبب بند ہیں جس کے باعث ٹریفک جام ہے، لاکھوں کی تعداد میں گاڑیاں سڑکوں پر موجود ہیں، ٹریف جام کے سبب ذیلی سڑکیں گھی بند ہوگئیں ہیں۔


مزید پڑھیں: ’’ آئیڈیاز 2016: یونی ورسٹی روڈ کی تزئین و آرائش کا کام شروع ‘‘


خیال رہے آئیڈیاز 2016 سے قبل ٹریفک پولیس کی جانب سے پلان دیا گیا تھا اور شہریوں سے اپیل کی گئی تھی کہ وہ اس پر عمل کرتے  ہوئے خود اور دوسروں کو پریشانی سے بچائیں تاہم پولیس نے علی الصباح نیپا سے حسن اسکوائر آنے والی سڑک بھی بند کردی تھی جس کے باعث گلشن اور ملحقہ علاقوں میں ٹریفک جام کا مسئلہ پیش آرہا ہے۔
Print Friendly, PDF & Email

Comments

comments

یہ بھی پڑھیں