بیجنگ: چینی صدر ژی جنگ پنگ نے کرونا وائرس سے نمٹنے کے لیے مدد کرنے پر سعودی فرمانروا شاہ سلمان کو فون کر کے شکر گزاری کا اظہار کیا۔
تفصیلات کے مطابق چینی صدر ژی جنگ پنگ نے سعودی فرمانروا شاہ سلمان کو فون کیا، چینی صدر کا کہنا تھا کہ سعودی عرب کی جانب سے حمایت اور مدد کی پیشکش کو سراہتے ہیں۔
سعودی فرمانروا شاہ سلمان نے کہا کہ سعودی عرب چین کی ہر ممکن مدد کرنے کے لیے تیار ہے، سعودی عرب چین کے ساتھ مشکل وقت میں کھڑا ہے اور چین کے ساتھ تعلقات مضبوط کرنے کے لیے کام کرتا رہے گا۔
سعودی عرب نے چین کے کرونا وائرس سے متعلق اقدامات کو بھی سراہا۔
چینی حکام کے مطابق اب تک پاکستان، امریکا، برطانیہ، جاپان، روس اور دیگر ممالک نے میڈیکل آلات، ماسک، حفاظتی کپڑے اور دیگر سامان بھجوایا ہے۔
خیال رہے کہ گزشتہ روز سعودی فرمانروا شاہ سلمان نے، شاہ سلمان مرکز برائے امداد و انسانی خدمات کو ہدایت کی تھی کہ وہ ہنگامی بنیادوں پر امدادی سامان اور ادویات چین روانہ کریں تاکہ کرونا وائرس کی روک تھام سے ہونے والے نقصانات پر قابو پانے میں چین کو مدد مل سکے۔
دوسری جانب چین کے شہر ووہان میں کرونا وائرس کے مریضوں کی تعداد میں اضافہ ہورہا ہے، اب تک جان لیوا وائرس سے 636 افراد موت کے گھاٹ اتر چکے ہیں، پورے چین میں 31 ہزار افراد اس وائرس سے متاثر ہوچکے ہیں۔
چین سے باہر کرونا سے متاثرہ 191 کیس سامنے آئے ہیں تاہم ان میں ہلاکتوں کی تعداد صرف 2 ہے۔
