بیجنگ: چینی صدر شی جن پنگ نے 2020 کو غیر معمولی سال قرار دیتے ہوئے کہا ہے کہ چین کے دیہی علاقوں میں موجودہ معیار کے مطابق تقریباً 10 کروڑ افراد غربت سے نجات حاصل کر چکے ہیں۔
تفصیلات کے مطابق نئے سال 2021 کی آمد کے موقع پر چینی صدر مملکت شی جن پنگ نے چائنا میڈیا گروپ اور انٹرنیٹ کے ذریعے مختلف ممالک کے عوام کے لیے نیک تمناؤں کا اظہار کیا۔
چینی صدر نے اپنے پیغام میں 2020 کو غیر معمولی سال قرار دیتے ہوئے کہا کہ اس سال کرونا وائرس کی عالمی وبا کا سامنا رہا اور اس دوران ہم نے انسانی زندگی کو اوۤلیت دی۔
انھوں نے وبا سے متاثرہ مریضوں کے ساتھ ہم دردی کا اظہار کرتے ہوئے وبا سے نبرد آزما ہونے والے تمام عوامی ہیروز کو سلام پیش کیا اور کہا ہم نے یک جہتی اور ثابت قدمی کے ساتھ اس عالمی وبا کے خلاف جدوجہد کی نئی تاریخ رقم کی۔
چینی صدر نے کہا کہ دنیا کے مختلف ممالک کو ایک ساتھ مل کر وبائی اثرات کے خاتمے کے ساتھ ساتھ ایک مزید خوش حال گھر کی تعمیر بھی کرنی چاہیے، چین نے وبائی صورت حال کے دوران اہم عالمی معیشتوں میں سب سے پہلے مثبت شرح نمو کا ہدف حاصل کیا، ملکی سطح پر سائنس اور ٹیکنالوجی میں بھی اہم پیش رفت ہوئی۔
چین کا اپنے شہریوں کو کرونا ویکسین مفت دینے کا اعلان
شی جن پنگ نے کہا کہ چین کے دیہی علاقوں میں موجودہ معیار کے مطابق تقریباً 10 کروڑ افراد غربت سے نجات حاصل کر چکے ہیں، چین مستقبل میں اصلاحات اور کھلے پن کو مزید پختہ عزم کے ساتھ وسعت دے گا۔
چینی صدر نے کہا کہ 2021 کمیونسٹ پارٹی آف چائنا کے قیام کی 100 ویں سال گرہ ہے، ہم پارٹی کے ’عوام کو مرکزی اہمیت دینے‘ کے انتظامی تصور کا اعادہ کرتے ہیں، کیوں کہ درست اقدار اور اخلاقیات کو دنیا بھر میں مقبولیت حاصل ہوتی ہے۔
انھوں نے مزید کہا کہ ہم اس عظیم راستے پر تنہا نہیں ہیں اور پوری دنیا ایک کنبے کی حیثیت رکھتی ہے۔ چینی صدر نے اپنے پیغام میں مختلف ممالک کی سلامتی اور عوام کی خوش حالی کے لیے نیک تمناؤں کا بھی اظہار کیا۔
