دنیا بھر کے سمندروں میں کشتی الٹنے کے اندوہناک واقعات پیش آتے ہیں جن میں سینکڑوں افراد اپنی جان سے چلے جاتے ہیں۔ اب ایسی کشتی بنا لی گئی ہے جو سمندر میں الٹنے کے بعد خودبخود سیدھی ہوجاتی ہے۔
ایکس ایس وی 17 تھنڈر چائلڈ نامی اس کشتی کو بنانے کا مقصد سمندر میں ہونے والے حادثات سے بچنا ہے تاہم اس کے فیچرز دیکھ کر لگتا ہے کہ اسے عام انسانوں کے لیے نہیں بلکہ جاسوسی اور جنگی مقاصد کے لیے بنایا گیا ہے۔
اس کشتی کی تیاری میں خیال رکھا گیا ہے کہ اسے زیادہ سے زیادہ مضبوط بنایا جائے، یہ کشتی ہر قسم کے موسمی حالات میں اپنا سفر جاری رکھ سکتی ہے۔
12 افراد کی گنجائش پر مشتمل اس کشتی کی نشستیں ایسی ہیں جو جھٹکے لگنے کی صورت انہیں جذب کرلیتی ہیں اور بیٹھنے والے کو محفوظ رکھتی ہیں۔
60 میل فی گھنٹہ کی رفتار سے چلنے والی اس کشتی میں ہتھیار بھی رکھے جاسکتے ہیں، اس کے اگلے حصے پر ایک مشین گن یا گرینڈ لانچر نصب کیا جاسکتا ہے جو ڈیک کے نچلے حصے میں چھپایا جاسکتا ہے۔ یہ ہتھیار کیبن سے کنٹرول کیے جاسکیں گے۔
تھنڈر چائلڈ ریڈار سے بھی بچ نکلتی ہے جبکہ اس میں نائٹ ویژن کیمرہ سسٹم بھی موجود ہے۔
اس کشتی کا بہترین فیچر اس کے الٹنے کی صورت میں خودبخود سیدھا ہوجانا ہے جس سے اندر موجود افراد کسی حادثے سے محفوظ رہ سکتے ہیں۔